七月初一是中國共產黨建黨一百周年紀念日，根據中國新華社六月三十下晡的報導，包括中國國民黨前主席連戰、洪秀柱、親民黨主席宋楚瑜等，陸續向中國共產黨表達祝賀。
根據報導，連戰佇賀電指出，「中國共產黨創建百年，主導神州大陸建設七十二年，中華民族復興進程已經達到五千年歷史新高峰！」真ǹg望兩岸關係和平發展，「所有中華兒女合力為咱民族的事業再造新遒（iû）」。Bat作過中華民國副總統、中國國民黨主席的連戰，伊的賀電是講，好得一百冬前的七月初一中國共產黨建黨，才有法度tī二十八年後的1949年，kā中國國民黨的中華民國偃倒（ían-tó），中國共產黨才會tàng「主導神州大陸建設七十二年，」「中華民族復興進程」才有法度「已經達到五千年歷史新高峰！」連戰chit陣是滿心感謝中國共產黨，1949年kā中國國民黨的中華民國政府拍kah走無路、不得已才走來台灣作難民。
中國國民黨前主席洪秀柱透過賀函表示，「中華民族偉大復興是歷史的必然」。足希望兩岸「促進融合，心靈契合，竭盡心力共同完成國家統一大業，共築國家富強、民族復興、人民幸福的中國夢。」咱干單beh問洪秀柱前主席，你當年那會以「難民」的身分走路來台灣？避啥物難來台灣創啥？
Bat作過中國國民黨中央黨部秘書長、台灣省長、現任親民黨主席的宋楚瑜佇賀電中指出，「中國共產黨艱苦卓絕，奮鬥不懈，重振華夏，以人民福祉為先，人類命運共同體為念，深深hō͘世間人重新看待」。誠向望未來雙方致力促進兩岸和平發展，「實現中華民族復興」。宋楚瑜是講，好佳哉100年前中國共產黨創立，1949年kā中國國民黨的中華民國政府趕來台灣，才會tàng 重振華夏，中國共產黨實在真了不起。請教宋楚瑜主席，你當年那會以「難民」的身分走路來台灣？是叼一個偉大的黨害你變作難民？你今仔日大大kā謳咾？
上蓋巧的是中國國民黨中央黨部，完全無拍算beh發賀電，干單強調過去無論中國國民黨抑是中國共產黨的黨慶，兩黨攏無拍賀電hō͘對方的前例。
早前中國國民黨佇台灣教育咱，中國共產黨是「萬惡的共匪」，咱若無tòe伊按呢講tio̍h是「思想有問題」。今仔日中國共產黨猶裝兩千粒飛彈對台灣，猶處處阻礙咱台灣買武漢肺炎疫苗，無罵in to̍h慘死了ah，三位中國國民黨前主席竟然公開大大謳咾中國共產黨.，一個比一個koh khah bē見笑！
世界上蓋bē見笑的是叼一個？你講咧。