十一月二七，行政院長蘇貞昌第13遍去立法院進行施政報告，因為政府有beh放寬含有萊克多巴胺（Ractopamine）的美國豬肉進口，致使立法院猶koh發生肢體衝突的混亂場面，中國國民黨團甚至佇議場內潑豬內臟。歸個議場臭mo-mo。同時，中國國民黨黨團佇議場內歕bi-á kah ji̍h空氣喇叭製造噪耳（chhò-hīⁿ）的聲音，阻礙蘇院長的施政報告kah總質詢的進行。
十一月三十，立法院秘書長林志嘉出席立法院司法kah法制委員會，就「國會議事中立kah院區管理缺失」進行專題報告而且接受備詢。立法院司法法制委員會召委、中國國民黨立委李貴敏認為，應嚴守中立的立法院，無應該隨便跳過立法院議事規則中明訂的國是論壇時間，剝奪立委發言權利，甚至干單確認議事錄tio̍h beh進行施政報告，實在有明顯的缺失。所以伊決定變更議程，邀請林志嘉今仔日列席委員會，就「國會議事中立kah院區管理缺失 」進行專案報告並受備詢。林志嘉會前記者訪問的時有指出，國是論壇一般來講是上午九點到十點進行，若有黨團佔據主席台，tio̍h無法度進行。Chit遍中國國民黨團杯葛12次，其中有6次、差不多40工左右無國是論壇。伊講，原則上國是論壇tio̍h是盡量要求各黨團hō͘伊順利進行，若是硬beh佔領主席台tio̍h無法度進行，chit種情形兩黨差不多仝款，m̄是針對叼一黨；上午九點到十時若有一黨佔據主席台，國是論壇tio̍h無法度進行。
講起十一月二七hit工，中國國民黨立委佇議場內潑豬內臟，林志嘉指出，立法院總務處當日tio̍h請清潔公司來清洗，二八、二九兩工koh有做特別的消毒清洗，chit部分大概用5、6萬；希望清洗了後會tàng完全攏無味，按呢tio̍h無必要換地毯。若是tio̍h換地毯，差不多tio̍h開百外萬。有媒體追問，設使若換地毯，是m̄是會向破壞的黨團討錢？林志嘉強調，一定會向in要求賠償，叼一個黨團the̍h豬內臟入來的，叼一個黨團tio̍h負責賠償。
有人講話勻勻仔講，kah你講道理，人講伊是有教養的人；有人講話比鬥緊的、三句作兩句講，有時無人知影伊teh啥，人講伊是急性的人；有人話講無兩句tio̍h起腳動手，夯刀夯棍甚至夯銃，人會問講伊敢是烏道的？有人相罵冤家、家己khah無理、抑是講bē贏人，tio̍h用紅漆去潑對方，人會講伊敢是阿共的人煽動的，才會用紅的漆；中國國民黨佇立法院議場撥臭mo-mo的豬內臟，你講中國國民黨是啥款物黨？有人罵講：中國國民黨是糞埽黨、中國國民黨是比豬內臟koh khah臭的lah-sap黨！你講咧？