逐個攏知影，最近chit幾年全球供應鏈晶片嚴重欠貨，晶圓代工龍頭台積電佇國際上的地位愈來愈重要。
五月三十，中國人民大學重陽金融研究院舉辦2022年春季「中美論壇」，中國國際經濟交流中心總經濟師陳文玲針對中美目前關係發表看法。伊講，因為新中國70年、改革開放40年已經取得的成果「有可能攏總放水流」，所以咱tio̍h「應該採取對對手上蓋不利的形式進行報復性打擊」。特別是當西方有可能親像制裁俄羅按呢仝款對中國進行「毀滅式制裁」的情況之下，「咱一定tio̍h愛收復台灣，特別是teh進行產業鏈、供應鏈重構方面，一定tio̍h愛kā台積電chit間原本tio̍h屬於中國的企業搶到中國手裡。In chit陣當teh加緊速度向美國轉移，beh佇美國建立六個廠，咱絕對bē-tàng hō͘伊轉移的目標全部實現」。
六月初七，日本《產經新聞》台北支局長矢板明夫（Ya-ita Aki-o San）佇面冊頂面Po文講，中國chit-má連經濟學家都變作戰狼，「會tàng講中國的前景堪憂」。Ya-ita Aki-o San講，早前中國為tio̍h統一，bat向台灣民眾提出過各種感性的訴求，像講「攏是炎黃子孫、同文同種、血濃於水、兩岸一家親」等等，但是chit遍卻無小心kā真實的想法講講出來。陳文玲佇中國國務院工作真濟年，參與起草國務院總理的政府工作報告真濟遍，中國每年年底召開的中央經濟工作會議相關文件mā大部分攏是伊經手的，佇某種意義上「伊是非常了解中共高層對真濟重大問題的看法」。Chit遍陳文玲的「搶台積電論」，mài講台灣人的感受bē爽，干單ùi經濟活動的基本理論來講mā是反智的，「台積電無kā生產上尖端晶片的工廠設佇中國，是因為中國的環境無適合，che包括當地政府的投資kah匯率政策、政治風險、國際信譽、法治環境等等。」Chiah-ê以外，台積電雖然是台灣企業，但是外國資本的持股比例早tio̍h已經超過7成，設使中國的投資環境足適合台積電發展，股東自然tio̍h會提出要求繼續去中國設廠。伊強調：「高科技企業需要有優秀的人才kah技術，koh khah重要的是，tio̍h愛有一個自由發揮的環境。」伊直剖，三工兩工tio̍h學習領導人的重要講話、政策朝令夕改、動bē-tio̍h to̍h強制封城的國度，準講台積電去hia「mā真有可能tī幾年內倒翹翹。」
我的是我的，你的mā是我的，我無的、我愛的tio̍h用搶的，tio̍h是土匪。Chit遍中國只不過是無kā笑面的siáu鬼仔殼掛起來，土匪面煞盡展hō͘咱看。