十一月二十，中國官方媒體《人民政協報》佇第五版「兩岸經合週刊」刊出一篇文章：「為啥物講台灣的前途在佇統一？」文章講，若統一台灣了後，台灣民眾上蓋有感的好處，mā是上蓋直接的好處是，台灣2,300萬民眾每人每年會tàng增加收入新台幣兩萬外元。論點是統一台灣了後，中國tio̍h bē拍台灣，台灣tio̍h免開錢買軍備武器kah減開金援外交，chit兩條錢攏省起來，節省支出新台幣6,000億，會tàng分hō͘台灣2,300萬民眾，每人每年增加收入新台幣兩萬外元，對普通百姓來講，chiah呢好的統一，當然會期待。
統一台灣了後，台灣2,300萬民眾每人每年會tàng增加收入新台幣兩萬外元，有啥物好期待？設使台灣目前是一個無自由無民主無人權的所在，中國是一個自由民主人權先進的國家，喝聲講若是統一台灣了後，台灣2,300萬民眾tio̍h 會tàng kah十四億中國人仝款、kah世界先進國家的人仝款，過tio̍h有自由實行民主尊重人權的生活，按呢台灣普通百姓會有期待mā khah有影。事實是抵抵倒反，台灣是一個自由民主人權的所在。設使台灣目前生活水準khah低，中國人是過tio̍h世界級富裕的生活，大聲喝講若是統一台灣了後，台灣2,300萬民眾tio̍h會tàng kah十四億中國人仝款、kah世界先進國家的人仝款，過tio̍h富裕快樂的生活，有可能有一寡台灣民眾會欣羨。事實上是台灣比中國好真濟，台灣人口2,300萬人、每人平均GDP是美金2.838萬，中國上愛展的一線四大城市「北上廣深」—北京上海廣州深圳，無一個城市比台灣khah好。北京人口2,189萬人、每人平均GDP是美金2.391萬、台灣的84.2%；上海人口2,487萬人、每人平均GDP是美金2.256萬、台灣的79.5%；廣州人口1,867萬人、每人平均GDP是美金1.940萬、台灣的68.4%；深圳1,756萬人、每人平均GDP是美金2.284萬、台灣的79.5%。
若是照中國國務院總理李克強所講的，中國有六億人每個月的收入無夠人民幣1,000元、約新台幣4,300元，老實講，中國若beh對台灣統戰，講tio̍h錢tio̍h真iàn氣，差咱hiah濟也敢講錢。有才調tio̍h講制度，講中國實施共產主義制度，啥物啥物啥物，比台灣實施民主制度加好真濟。講會出來、koh講會出一套聽了人會服伊的道理來，咱mā小小kā尊敬。無，完全講bē出來，干單會曉用武力威脅咱，抑是逐工軍機飛入來咱的西南防空識別區擾亂，咱那看伊會起咧？中國人hiah濟，敢無幾個仔khah有頭殼的？
中國對台灣按呢統戰，笑死人！真正m̄驚笑破人的嘴？