Ùi五月初一12點開始，中國渤海、黃海、東海kah北緯12度以北的南海海域，全面進入「海洋伏季休漁期」bē使出海掠魚。休漁期到八月十六12點結束，有5萬外隻漁船受影響。休漁期一下過，中國一寡漁船拚拚來澎湖越界掠魚。
八月二三早起，澎湖海巡隊佇貓嶼發現中國「無船名」的油料補給船，經過幾遍廣播叫伊停船受檢，無插你。海巡隊kā jiok kah tio̍h，強kā船押來馬公偵辦。配合衛生局、防疫檢疫局人員進行中國漁船消毒作業kah船員相關檢疫措施，確保防疫無漏洞。船員先行送往烏崁安置隔離14天再製作筆錄。姓蔡的船長講船名是「興順66號」，因為新買的猶未過戶，所以船頭船尾攏無船名。
八月二四，澎湖海巡隊查扣一隻無船名越界的中國漁船，留置調查44工，罰款200萬，十月初六，澎湖縣政府農漁局先kā切割、沒收起網機2台、網板4具、滾輪2具，防止中國漁船翻身koh來越界掠魚，中晝由澎湖海巡隊巡防艇kā驅離出境。近來澎湖海巡隊查tio̍h的中國漁船，有真濟是無船名抑是AB船（AB船tio̍h是兩隻漁船寫仝一個船名），che是m̄是kah最近台海局勢緊張有關，咱當teh做進一步調查。
十月二二，海巡署近岸雷達發現有真濟隻中國漁船靠倚西吉嶼海域，koh用來避風作理由，一大陣中國漁船入侵澎湖南方四島國家公園海域，海巡署艦隊分署隨時調派3,000噸級高雄艦ùi高雄港緊急出勤，拚去用水砲kā in趕走。艦隊分署會繼續採取驅離、扣留、留置、沒收漁獲漁具、罰款kah沒收船隻等六大手段，強勢查緝非法越界中國漁船，展現政府堅定護漁的立場kah決心。
十月二八，中國國台辦砲轟咱國海巡署「野蠻」、「不人道」，hō͘人真憤慨。隨時hō͘咱想起印尼海洋漁業部女部長蘇西（Susi Pudjiastuti），伊講印尼的海域是全世界上廣濶的，beh監控的海域實在傷過大，無可能逐位攏管顧會到。伊的phiat步是伊本人坐軍艦出巡，若看tio̍h非法越界偷掠魚的外國漁船，伊命令先kā所有掠tio̍h的漁獲攏總放落海，而後kā漁民攏載起來軍艦頂頭，佇漁民的面前kā漁船炸掉，確實有收tio̍h威嚇kah震懾的效果。而後才kā違法的外國漁民送去Jakarta法院判刑。莫怪印尼人會kā伊畫作下半身是一尾美人魚、頂半身是夯一枝衝鋒槍的美女。Hō͘伊炸掉的中國漁船m̄-nā十隻八隻。中國國台辦beh罵咱台灣海巡署「野蠻」、「不人道」進前，拜託先去探聽一下，印尼chit位海洋漁業部女部長，按怎處理越界掠魚的外國漁船。
海巡署用水砲kā中國漁船趕走，抑是掠來判刑關監，實在是有夠文明客氣！