中國軍機來擾亂咱國的航空識別區已經成作日常生活的一部分，過年前兩工的二月初九、初十中國軍機無來擾亂。有人想講是中國空軍準備beh好好過年，無疑誤舊曆過年hit工中晝koh來亂，有人搖頭講:「嘴講兩岸一家親，卻連過年日都來亂，無beh hō͘咱的空軍健兒好好食一頓團圓飯。實在真可惡 !」中國軍機過年日中晝十二時三十四分進入咱國的ADIZ（西南空域），懸度2,000公尺，咱空軍佇空中監控而且廣播kā in趕走；仝一個時間，另外有一台中國空軍500預警機佇防空識別區外teh進行警戒。
干單舊曆新正歇一工。初二透早九點，一台中國運8反潛機kah一台運8技術偵察機tio̍h進入咱西南空域，懸度4,000公尺。有人氣kah大聲罵講：Chia m̄是恁外家，免來作客！Koh有人罵講：開春初二tio̍h來擾亂別人，恁會衰歸年！初三早起十一點四十分，中國軍機進入咱國西南空域，懸度2,100公尺，Chit兩工，咱空軍攏有佇空中監控而且廣播kā in趕走。
新正初四，咱台灣人tī chit工迎財神，咱迎財神kah in中國空軍tī大代？透早九點，中國一台軍機運8反潛機tio̍h進入咱國西南空域防空識別區。咱除了用防空飛彈追蹤監控以外，mā派空中巡邏兵力應對、而且廣播kā in趕走講：「中華民國空軍廣播，佇台灣西南空域懸度3,000公尺的中共軍機注意！你已進入阮空域，影響阮飛航安全，隨時迴轉離開！」
初五隔開早起，中國一台「運8」反潛機ùi台灣海峽中線以南進入咱國防空識別區，空軍有派空中巡邏兵力應對，而且用廣播kā in趕走。
二月十七舊曆初六早起，中國兩台「運8」技偵機進入咱國西南空域防空識別區。二月十八下晡，中國一台「運8」技術偵察機進入咱國西南空域防空識別區。照慣例，咱攏有派軍機應對、防空飛彈監控、廣播kah in趕走。
根據國防部的統計，舊年2020年一年三百六十五工，中國軍機接續無停來擾亂咱國西南空域，有380外台次；差不多逐工to̍h有一台中國軍機來報到。今年一月三十一工，中國軍機來亂咱西南空域有二十七工。
咱知影，中國軍機是進入咱國的西南空域防空識別區，並m̄是領空，中國軍機當然mā知影，咱bē-tàng開銃動武，干單會tàng用趕的。像講舊年2020年六月二四半暝，兩台俄羅反潛機IL-38飛入美國Alaska防空識別區，美國mā是干單會tàng趕緊出動F-22戰鬥機去kā in趕走niā-niā。
中國軍機一直飛來咱的防空識別區，當然m̄是來「行春」，是來亂的。