一月二八，陸委會表示到一月二八為止，有接tio̍h 158通民眾的電話，反映本人抑是有厝裡的人tiâu佇武漢，佇hia的台灣人約有三百人，差不多攏是短期出差、旅遊、抑是探親的，攏m̄是長期經商tòa佇hia的。海基會透過各種管道kah中國海協會協商，想beh派包機去接tiâu佇武漢的台灣人，In完全無回應。
一月二八，中國國台辦才以發言人馬曉光的名義發布新聞稿表示，照湖北台辦了解，到一月廿七下晡為止，當地無發現台灣民眾有人染病，koh講疫情發生以來佇湖北的台灣民眾得到好的照顧。湖北省台辦、武漢市台辦會繼續根據疫情防控工作需要，對hiah-ê佇湖北，特別是佇武漢的台灣人hō͘ in關心kah照顧，即時解決in抵tio̍h的困難kah問題。放一粒臭屁niā-niā，mā是無插咱。
一月二三透早兩點，武漢市官方佇社交媒體頂面宣佈，ùi hit工十點開始「封城」，全市海陸空交通攏總停運，所有的人攏bē-tàng出入武漢市。一月二六，湖北省長開記者會，根據武漢市長周先旺的講法，tī「封城」進前tio̍h已經有超過五百萬人離開武漢，留落來的人大約猶有九百外萬。
武漢的勢面那像愈來愈bái，根據湖北衛健委公布境內最新疫情，一月二七日0點至24點一工內，湖北省新增加新型冠狀病毒感染的肺炎確診病例有1,291個，其中武漢市892個，全省新增加死亡24個，武漢市22個。
佇武漢的外國人聽tio̍h武漢肺炎驚kah走假ná飛咧！M̄-tio̍h，應該講驚kah真正飛飛走。一月二九，日本派專機撤離佇武漢206名日僑，早起ùi武漢飛到東京Haneda機場，一月三十，已經確認其中有三個人染tio̍h病。日本政府有teh研究是m̄是tio̍h koh派出撤僑專機。日本政府表示，希望透過專機回國的日僑猶有440人，所以日本政府會派出第二台kah第三台撤僑專機。
一月二九早起，美國撤僑專機載240人飛離武漢，先飛到Alaska加油，tī加油期間，機頂的人攏先進行檢測，若有疑似患者，隨時送往當地病院接受治療抑是隔離。專機轉到加州了後，先tòa入去已經準備好勢的臨時住所tòa兩禮拜觀察。一月二七，法國總理菲力普宣布，會tī一月三十抑是三十一，安排專機ùi武漢撤出成百個法國僑民中間有意願beh轉去的人。一月三十晚，南韓派撤僑專機飛武漢載第一批360個韓國人轉去。一月二八，荷蘭政府mā當teh評估按怎ùi武漢撤離20名荷蘭公民的方法。一月二九，澳洲kah紐西蘭共同宣布，計畫beh合作撤離佇武漢600外個兩國的僑民。咱佇武漢的台灣人咧？
In家己講是「祖國」的中國，kā咱佇武漢的台灣人攬tiâu-tiâu走bē離！