「武漢肺炎」佇中國發燒，武漢市封城進前有五百萬人走出去，歸個中國一個一個的城市封起來，甚至kā歸個省封起來。中國每工確診的人數那起飛，死亡的人數直直增加。咱看tio̍h ùi武漢走出去的五百萬人m̄-nā kā全中國òe kah無一塊土地是清氣的。Koh khah悲哀的是，hit五百萬人òe全中國猶無夠，中國四箍圍的國家包括南韓、日本、越南、新加坡，一直到西亞的伊朗mā tio̍h災tio̍h kah足嚴重，續落去kah中國上親蜜的歐洲國家－義大利，變作歐洲的武漢，kā歸個歐洲òe kah足悽慘，連遠遠的美國mā五十州攏有確診的病例。Tī「武漢肺炎」抵抵爆發的時，「美國疾病預防管制中心」“美國CDC”有預測講，台灣chiah倚近中國，有可能是中國以外疫情第一悽慘嚴重的國家。咱那會bē驚bē煩惱咧？好佳哉，咱的政府佇每一步攏做到超前的部署，hō͘咱台灣成作世界防疫的模範，真濟國的領導者攏講佇「武漢肺炎」防疫工作beh kah台灣學。
咱佇「武漢肺炎」有驚無險的中間，除了感謝政府各單位足拚勢盡力防疫，所有的醫療人員無暝無日的辛苦工作以外，咱mā感受tio̍h溫柔對待的小故事。
一位tòa佇板橋退休的成衣工廠老闆魏金枝女士，知影台灣「嘴am」有限制，所以會使水洗、會tàng延長「嘴am」壽命的「嘴am套」真受歡迎，伊決定用過去的手藝，tī連續假期期間，家己去買布料、設計，招伊的厝邊頭尾親成朋友，做夥來裁剪，落去車、落去thīⁿ，趕出兩百幾個「嘴am套」。伊講，伊的查某子佇「恆春基督教病院」上班，伊知影偏鄉的恆春防疫的資源kah都市bē比得，魏女士想講「疼惜查某子佇hia上班的恆春基督教病院，tio̍h是疼惜家己的查某子，kā恆春基基教病院的需要當作家己厝裡的人的需要。」伊所做的，tio̍h是teh發揮恆春基督教病院的精神：「照顧台灣尾，疼你的厝邊親像家己。」當恆春基督教病院的醫護人員接tioh一大包「嘴am套」，那像接tio̍h天頂落（lak）落（loh）來的禮物，趕緊拍電話kā魏阿姨說謝。
因為「武漢肺炎」疫情的關係，台灣高中以下各級學校chit學期開學日延到二月二五，一時之間全台灣攏買無「酒精自動噴霧器」，開學了後，同學看校長每早起徛佇校門口，佇一個一個同學的手噴酒精。同學拜託老師教in按怎利用「樂高積木」，製作出三個「酒精噴霧機器人」，手倚去，酒精tio̍h會自動噴出適量的酒精殺菌消毒。按呢校長tio̍h m̄免逐早起hiah呢辛苦徛佇學校門口kā同學的手噴酒精。Che是全校干單有七十六位學生彰化二林興華國小的故事。
莫怪有人講「台灣上súi的風景，tio̍h是人。」