七月二十，南京祿口國際機場對員工進行例行核酸檢測的時，發現有9個確診病例，chit 9個人攏是佇機場做飛機清潔工作的清潔員。根據江蘇省衛生健康委員會的報告，七月二五江蘇省新增加本土確診病例39例中，南京市佔38例，其中有8例是無症頭感染者轉作確診病例。In得tio̍h的武漢肺炎是Delta變種病毒。
自按呢疫情ùi南京擴大新一輪的疫情，病毒已經湠（thòaⁿ）到中國大陸十幾省市，大連、張家界、成都、北京、武漢等城市相續出現有關聯性的病例，確診人數持續升懸。武漢市八月初一至初二，經過核酸檢測發現有7個人是陽性，che是武漢市ùi舊年六月清零以來頭一遍出現新個案。根據《北京日報》報導講，南京疫情傳播鏈延長到至少365個人，溢出去24個城市。中國七月累計新增加病例等於是前五個月的總和。
專家表示，目前佇中國傳播的毒株主要是Delta毒株，傳播速度真緊、體內複製mā真緊、轉陰的時間khah長。各地攏提醒居民「非必要不出省、不離市」。目前已經有17省出現確診病例；中國官媒《人民日報》講，除了雲南、上海以外，其他地區的確診事件攏kah南京有關，北京mā已經淪陷。
小小一個南京祿口國際機場的9個清潔工人，會tàng舞kah全國大緊張。
想起2019年十二月，佇衛服部疾管署擔任副署長的羅一鈞醫師，佇網路頂面發現有網友提起中國武漢的華南海鮮市場有出現親像SARS的案例，伊隨時向頂司報告、向中國相關單位查證，而且向世界衛生組織（WHO）通報。十二月三十一，咱政府對武漢直航班機實施登機檢疫。2020年一月十三，安排傳染病防治醫療網莊銀清指揮官kah防疫醫師洪敏南去中國武漢，收集一寡kah疫情相關的資訊，一月十六轉來召開說明會。才知影代誌嚴重。一月十五，疾管署公告新增加「嚴重特殊傳染性肺炎」作第五類傳染病。一月二三，武漢封城，咱國禁止武漢的人入境，直航班機停飛，而後才改中國人攏不准入境等措施。一月二四，禁止醫療用嘴掩出口；一月三十一，徵用全國嘴掩工廠生產的醫療用口罩；二月初六實施全國嘴掩實名制，逐人攏買有嘴掩。按呢，台灣才比全世界任何國家攏khah早作預防，tī第一波全世界tòe中國tio̍h災的疫情中，台灣一直是防疫的模範生。為什麼？因為咱早早借tio̍h武漢疫情hit面鏡。
今仔日，咱借tio̍h南京疫情chit面鏡，相信會tàng kā防武漢肺炎Delta病毒chit-ê防疫工作，猶原作世界的模範生。