一月二八，副總統賴清德參加宏都拉斯總統就職典禮的時，kah美國副總統賀錦麗有互相請安講幾句話，後來賀錦麗上台致詞的時，mā特別向賴清德致意，而且指賴清德是kah伊「對等」的台灣官員，意思是講仝款是副總統。
一月二九，中國外交部發言人趙立堅罵講：「台灣只不過是中國的一個省，beh那有啥物『副總統』！」Koh講中方一貫反對美台進行任何形式的官方往來，賴清德家己講是務實的台獨工作者，有幾遍發表台獨言論，美方應該恪守一個中國原則kah中美三個聯合公報的規定，嚴肅對待中方立場kah關切，bē-tàng向台獨勢力發出任何錯誤的信號。
一月三十暗，陸委會嚴正聲明，賴副總統chhōa團參加宏都拉斯總統就職典禮，代表咱政府kah人民對新政府堅定的支持，mā kah友邦kah美國等友好國家正、副元首、特使團代表交流；中華民國是主權國家，台灣自了m̄是中華人民共和國的一部分、那是啥物in的一省？
一月三十暗，中國國民黨文傳會主委凌濤透過新聞稿表示，中華民國是一個主權獨立的國家，中華民國自創建以來，tio̍h 設有總統職務；依據「中華民國憲法」選舉產生的總統、副總統，權威性kah合法性無容允大陸當局插嘴。
Khah可惜的是，無管是陸委會抑是中國國民黨，攏是用紳士的氣口teh對土匪講話，那像蠓仔叮牛角—bē chiūⁿ mā bē疼，實在是無彩工。
一月三十，政治評論家黃暐瀚佇面冊講：伊會tàng理解，徛佇中國的立場為啥物m̄承認台灣是一個國家。但是台灣的政治人物，若是無對趙立堅的發言抗議反對，猶koh beh參選中華民國的公職創啥？可能是我目睭chhùh-chhuh，無看tio̍h中國國民黨的政治人物對趙立堅的侮辱有一點仔反應。前一站仔逐個teh談蔣經國，設使chit-má的總統是蔣經國，伊的副總統hông按呢侮辱，蔣經國會按怎講咧？會記得2003年台灣beh參加WHA，有記者問講「恁敢無聽tio̍h台灣2,300萬人民的需要？」中國大官沙祖康講：「誰理你們」，自按呢了後中國大官無論講啥物話，台灣人早tio̍h習慣bē受氣ah。
黃暐瀚講，若講賴清德m̄是副總統。按呢吳敦義mā m̄是，蕭萬長、呂秀蓮、連戰、李元簇、李登輝攏總m̄是。設使兩岸猶原beh按呢互相diss（意思是「無尊重」），咱chit旁是m̄是mā應該回in一句：「大陸只不過是一個叛亂團體，beh那有啥物外交部發言人咧？」
Chit句話確實問了sông koh有力。誠讚！