疫情造成兩岸交通差不多斷去，兩岸交流mā會使講是全部停掉，目一個nih春節tio̍h到。2020年十二月二八，中國國民黨智庫「國家政策研究基金會」舉辦［台商視訊會議］，三位台商代表攏講「台商轉去故鄉太難」，呼籲政府協助解決台商轉來台灣過年的問題以外，mā建議政府趕緊增加兩岸航點kah航班以及恢復小三通，hō金門人佇金門完成入境檢疫，規劃兩岸［疫苗泡泡］，提供台商多次採陰免隔離等等的建議。身兼智庫董事長的黨主席江啟臣表示，會tàng體會台商心情，中國國民黨立委會佇立法院呼籲行政院考量chiah-ê具體建議，以具體措施協助台商。中國國民黨智庫副董事長連勝文講，伊深深瞭解真濟台商家庭因為疫情被迫分隔兩地，伊有佇面冊提出，若佇（中國）大陸抑是東南亞有注（中國）大陸疫苗的台商，轉來台灣是m̄是猶原需要hông關14工？結果遭受圍攻，但是應該講的話猶原愛講。
由中國國務院主管的醫療健康企業「國藥集團」（sinopharm）日前研發新型冠狀病毒（COVID—19）疫苗，國藥集團是中國唯一由國務院國資委直接管理的一間中央醫藥企業，十一月二五向國家藥監局提交疫苗上市申請。但是《自由亞洲電台》報導，數百名接種過疫苗的外派員工，猶原集體感染新冠病毒。佇烏干達確診的47名中國員工，佇安哥拉、塞爾維亞等地的中國國企的外派員工mā相續感染病毒而且人數可能數百人，chiah-ê工人tī離境前攏有接種國藥集團研發的新冠病毒疫苗。照連勝文所講的，有注（中國）大陸疫苗的台商，轉來台灣是m是猶原需要hông關14工？Beh嚇驚死台灣人是boh？
一個黨［不懂］（put-tóng）嫌無夠，新黨跳出來鬥一擔。今年一月初二，新黨黨主席吳成典呼籲政府因應農曆春節beh到，為tioh hō khah濟台商、台生、台胞轉來過年，協商建立兩岸「防疫泡泡」，以金門作據點，恢復停班的小三通航線，hō兩岸同胞會tàng篩檢、承認疫苗注過等，免去14天隔離。
一月初三新聞報導，中國武漢肺炎疫情koh再起，因應疫情可能大規模爆發，內蒙古自治區呼和浩特市（舊名叫作歸綏）已經成立「消殺隊」，而且擬定建設43間方艙醫院待命，強調當地已經組織122支共4,077人的醫療救治隊伍，醫療救治後備人員也有5,645人，猶有1,261個負責通訊、防疫、公共安全、交通運輸的專門小組，kah 565人的「消殺隊伍」。你想講中國人食飽傷閒作囝仔sńg？新黨khah勇的人上好是先去內蒙古行行咧。
外國人謳咾台灣防治武漢肺炎做kah chiah好勢，是台灣奇蹟；我講，台灣出kah chit兩個不黨，koh khah是台灣奇蹟！