十月二十，歐洲議會以壓倒性票數通過「歐盟─台灣政治關係kah合作」報告，仝一工，咱外交部長吳釗燮宣布預定後禮拜會去訪問歐洲，吳釗燮佇立法院強調，「台灣kah歐洲交往的新時代已經來lo̍h」。對吳部長beh去歐洲訪問chit件代誌，中國外交部發言人汪文斌tī例行記者會指出講，tng teh密切關心注意有關人員「竄訪」的動向，會採取正當kah必要措施，堅定捍衛國家主權kah領土完整，任何人都bē-tàng對chit項代誌心存幻想。
十月二一，外交部發言人歐江安說明講，吳釗燮部長應斯洛伐克（Slovak）「全球安全智庫」邀請，會tī十月二六出席該智庫頭一遍舉辦的台灣論壇發表專題演講，主題是「疫情之後：韌性kah全球經濟合作」。而後會轉往捷克訪問，接受捷克參議長韋德持頒發參議院「國際貴賓獎項」銀質獎章。訪問期間吳部長mā有意向beh拜訪布拉格市長賀吉普，另外參加由捷克國家科學院kah捷克智庫「解析中國」合辦的研討會。
十月二四暗時，外交部長吳釗燮坐飛機前往歐洲，吳部長出發前佇Twitter發文表示，ùi in兩國天鵝絨革命到咱國野百合學運，台灣、捷克kah斯洛伐克緊密相連，仝款渴望自由、人權kah法治。「我真榮幸會tàng訪問chit兩國，而且kah in合作hō͘世界koh khah好。團結hō͘咱成作不可阻擋的良善力量！」
十月二六早起，佇中國外交部例行記者會中，中國外交部發言人趙立堅表示，吳釗燮是典型的「台獨分裂分子」，四處「竄訪」的真實目的是「鼓吹台獨分裂主張，製造一中一台假象」，離間破壞「中國kah建交國的關係」，中國對「有關國家寵sēng台獨分裂分子」表示「堅決反對」，要求有關國家「恪守一個中國原則」，bē使提供活動平台hō͘台獨分裂分子。趙立堅講，正告台灣當局企圖「挾洋自重」舞「台獨」注定是死路一條。中國捍衛國家主權kah領土完整的決心堅定不移，會採取一切必要措施堅決粉碎任何「台獨」圖謀。
外交部長吳釗燮tng teh斯洛伐克、捷克訪問，雖然有請假，但是佇立法院外交kah國防委員會無作訪問專案報告。委員會召委、中國國民黨立委陳以信非常不滿，佇面冊發文批評吳部長出席率低，根本藐視國會，吳部長一工無來外委會，伊tio̍h杯葛外交部預算審查。
比部隊班長的「一個命令一個動作」koh khah利害，中國共產黨「哼」一聲，台灣的中國國民黨tio̍h拼勢beh修理外交部長吳釗燮。拜託咧，國共兩黨敢一定tio̍h配合kah chiah呢bā？