七月初四，中國國民黨高雄市長參選人李眉蓁（bî-chin）佇in黨主席江啟臣陪同之下，去到左營區活動，最後一站到眷村合群里的時，有當地的里長陪伊去向鄉親拜託支持。李眉蓁講伊會拍拚做到hō͘少年人合意伊，m̄是親像民進黨高雄市長參選人陳其邁按呢，伊專工kā酸一下講，伊都會使叫陳其邁阿叔ah，陳其邁chit-má猶koh teh假少年。Kā少年人洗腦，無顧子孫未來後代的發展，按呢tio̍h真害ah。第二工去鳳山拜票，koh講一遍。
李眉蓁會按呢講，有可能是認為伊二十七歲tio̍h hō͘親民黨提名競選高雄市議員落選，三十一歲hō͘中國國民黨提名競選高雄市議員當選，有夠少年，而且連任三屆。Mā有可能是想講今年雖然四十一歲mā猶真少年。另外一種可能是伊認為今年五十六歲的陳其邁，老kah有資格作伊的阿叔。用少年kah年老來作對比。但是咱若用in兩位參與政治經歷的年齡來看tio̍h真清楚：李眉蓁三十一歲當選高雄市議員，陳其邁仝款三十一歲hit年當選的是高雄市立法委員、m̄是市議員，無比你khah老；李眉蓁三十四歲連任高雄市議員，陳其邁三十四歲以全國最高票連任立法委員；李眉蓁三十七歲連任高雄市議員，陳其邁三十七歲連任高雄市立法委員；李眉蓁四十一歲beh競選高雄市長，陳其邁四十一歲代理高雄市長，成作臺灣歷史上上少年的院轄市市長；李眉蓁今年若當選高雄市長，mā才kah陳其邁拍平niā-niā。以政治經歷的年齡來講，李眉蓁並無比陳其邁khah少年，職位mā無比陳其邁khah懸。
何況，咱評斷一個政治人物抑是一個普通人，重要的m̄是看伊身分證的年齡，注重的是伊的思想觀念kah做代誌的方法、態度、能力kah氣魄。有的人年歲少少，但是那像一個老古板、頭殼碇khok-khok的人；有的人雖然年歲有khah大，但是伊是一個真前進的、真會變巧的人。像講佇高雄已經舉辦十一年、南台灣上出名的「大港開唱」，去年九月，因為無得tio̍h老觀念韓國瑜市長的支持，宣布今年停辦。七月初六，陳其邁出現佇抵chiah啟用的大港橋，宣布若當選beh恢復「大港開唱」。Che tio̍h是有氣魄的少年氣。
「少年風神m̄免展」chit句台灣俗語話，下半句是：「有人比你khah少年。」咱看今年（2020）一月十一日，二十七歲的賴品妤（û）當選新北市第十二選舉區民進黨立法委員，成作第十屆中華民國立法委員中上少年的一位。有比李眉蓁頭一遍當選高雄市議員的時khah少年。今仔日，差十四歲的賴品妤若叫李眉蓁一聲「阿姨」，m̄知李眉蓁會按怎想？