六月十五，全國各縣市為上蓋年長、85歲以上的阿公阿媽注疫苗，凡若有做名冊的縣市攏做了真順序。咱用hong謳咾上濟的高雄市作例來講。高雄市照「中央流行疫情指揮中心」所公布的十大類注疫苗對象kah順序，事先tioh 一個一個ka名冊攏做好勢，一下接tioh「中央指揮中心」通知，幾月幾日beh送偌濟疫苗來，各區公所隨時會táng ka chit遍注會tioh疫苗的名單勾起來，隨時透過鄰里長發出注射通知單，足清楚寫明幾月幾日幾點到幾點佇啥物所在注射，提醒伊tioh帶身分證kah健保卡，隨時報到隨時注，免排列免等候。
像講五月二八到三十下晡六點，高雄市tioh ka收tioh的兩萬一千劑疫苗注完，主要對象是病院人員、防疫計程車kah警消等防疫人員優先注。六月初一
新分配的兩萬七千劑疫苗ma是照造好的名冊應該注的對象順序去注。無親像台北市按呢第一線的醫護人員無注tioh，分hou好心肝等診所連大樓管理員、拼掃的阿散ma攏有注tioh的情形。
Chit遍注年老的長輩，接tioh通知知影叼一工疫苗會到，隨時由各區的鄰里長發注疫苗通知單。遵照「中央流行疫情指揮中心」的指示，公告無設籍佇高雄市但是人tóa佇高雄的長者，緊向所tóa的區公所連絡，區公所辦事員問清楚姓名生時日月身分證號碼kah目前所tóa的住址電話號碼，第二工tioh接tioh電話通知，幾月幾日幾點至幾點，會記得帶身分證kah健保卡去離你上近的某某所在去注疫苗。高雄市政府為tioh行動無方便的長者準備計程車，每一區有兩間車行負責接送，注了koh坐原車載轉去厝裡，車錢由市政府負擔。
傳統注疫苗的流程，攏是「醫護無動、民眾動」，醫護人員坐佇固定地點待命，民眾先出示健保卡核對身分、ka醫生講病史，才移動去第二站種疫苗，注了才去觀察區歇睏。今年日本老人注武漢肺炎疫苗的進度傷慢，福岡市宇美町醫生發明一種疫苗接種法，改作「民眾無動、醫護動」，長者佇歸排的椅仔坐好勢，免徙振動免徛起來坐落去，單純坐佇有保持距離排好勢的椅仔、等待醫生坐有掛輦的椅仔lu來，問了病史才ka伊注射，醫護人員捒一台工具車抑是捧一腳貯疫苗冷凍箱kah注射用具tóe teh徙動。注了的長者恬恬坐佇原位免振動，觀察無不良反應半點鐘後才安心離開。M-na高雄市，真濟縣市的真濟所在ma採取chit種「宇美町式」注疫苗法，有樣thang看樣，實在誠好。
真特別的是，高雄有兩位音樂家專工拼去「大巨蛋」演奏音樂，hou恬恬坐佇hia的阿公阿媽加減欣賞，khah be無聊。
溫柔體貼ka老大人注疫苗，實在真感心。