十一月二五，台灣民眾黨發起人、台北市政府顧問蔡壁如佇廣播節目指出，希望逐個會使kā「支持柯文哲等於投民眾黨有連結」，kā政黨票投hō͘民眾黨。關於柯粉自發性（總統票）投廢票，替柯文哲2024大選「保溫」，伊講，若是對選情有幫助，伊本人bē反對逐個（總統票）投廢票。
蔡壁如講，真濟支持者一直反映，柯文哲chit遍無出來選真可惜，mā hō͘ in真著急煩惱，因為m̄知影票beh投hō͘啥人，所以tio̍h有柯粉發起「廢票運動」，直接佇選票頂面寫柯文哲，tio̍h是投hō͘柯文哲，koh會tàng替國家省30元，因為蔡英文總統已經真有錢ah，無需要chit個補助款。針對「廢票運動」，蔡壁如表示，身在民主國家無應鼓勵人投廢票，但是柯粉想beh幫助柯文哲2024大選「保溫」，透過廢票表示第四名總統候選人，對chit-ê運動我歡喜看伊會成；總統票投柯文哲雖然變成無效票，但是無效票加減mā會知影有偌濟人不滿，有偌濟人是隱藏的柯文哲支持者，順續預測一下2024。
真難得看tio̍h插政治的人戇kah m̄知影總統選舉一票30元補助款是hō͘政黨，戇kah講蔡英文已經真有錢ah，30元kah蔡英文有啥關係？第二，beh幫助柯文哲2024大選「保溫」，beh用啥物特別的保溫設備kā柯文哲保溫起來？保溫hiah呢久，敢m̄驚會臭酸去？
十二月十一，台北市長柯文哲出席「2019綠厝頂示範區記者會kah台北花卉（hūi）行銷推廣」活動了後，接受媒體聯訪的時講，伊本人卸任了後，若是無意外、身體有夠好，會競選2024總統。Giàn選mā免hiah早講！
Chit遍蔡壁如變khah巧，伊講，若是柯文哲確定有chit-ê規劃，民眾黨面對2020年大選，無論是區域抑是不分區立委攏tio̍h koh khah努力，chit遍若選無好，後面tio̍h真歹講，tio̍h先tī明年交出súi的成績單，才會tàng進一步規劃2024。
對chit點，親民黨總統候選人宋楚瑜表示，若beh追求四年後天邊的彩霞，不如kā現在應該做的基礎拍hō͘好。政治領導者上重要的是kā目前上重大的問題會tàng hō͘全國民眾安心，度過難關。
古早，佇日本有一個武士宮本武藏，kah佐佐木小次郎相約佇巖流島決鬥，武藏thiau工òaⁿ-òaⁿ才去，佇島上等候真久的小次郎愈等愈受氣，一下看tio̍h武藏慢慢仔划（kò）船上岸，小次郎氣phu̍t-phu̍t隨時puih刀出鞘（siàu）。武藏冷笑講：你輸ah！當然，hit場決鬥佐佐木小次郎輸佇宮本武藏的手下。
咱mā beh對痚痀（he-ku）bē忍得嗽的柯文哲講：你輸ah！