三月十六，立法院舉行環境保護、衛生福利、經濟等委員會聯席會議，beh討論日本福島食品進口議題。但是早起九點開會進前，中國國民黨黨團tio̍h霸佔主席台，要求「先公聽、再審查」，而且夯標語阻擋衛福部長陳時中上台報告。中國國民黨立委陳玉珍、鄭麗文甚至the̍h疫情死800外人來攻擊陳時中部長，責問陳部長：「咱疫情死800外人，你敢攏免負責？mài講beh koh來食chit號物件！」意思是講福島食品。惹陳部長氣kah徛起來講：「請你mài koh講hiah-ê死去的人。台灣因為Covid-19死去的人佇世界算是上低的。」話講猶未完鄭麗文立委隨時koh問：「台灣死800外人，我敢有講m̄-tio̍h？」陳部長應講：「香港死4,000外人。」鄭麗文立委問講：「你是講死800外人猶無夠是boh？800外人in敢m̄是注疫苗死去的嗎?」陳時中部長氣kah嘴掩溜落來，講：「In死去kah注疫苗有啥關係？Mài烏白牽拖lah！」最後由民進黨黨團總召柯建銘出面協調，雙方同意先舉行公聽會。聯席委員會猶未開始tio̍h來散會。
事後，陳時中部長對記者講：「我個人的修養猶koh需要改進。M̄-koh今仔日的主題是日本食品輸入的問題，那會直直問講疫情死800外人？當然，對每一位死去的人阮心攏真疼，但是mā-tio̍h看世界、想台灣。阮是chiah呢拍拼teh做，才會tàng維持chit-ê成績，無應該一下手kā阮的認真拍拼hú-hú掉，按呢對所有認真拍拼防疫的人實在無公平！
中國國民黨的立法委員傷過無閒，無時間關心世界發生的疫情。咱用陳部長所講的香港作例，人口748萬、台灣人口是in的3.2倍，到三月十五為止，香港疫情死亡人數是4,847個人，若照人口比例算起來佇台灣tio̍h死15,510個人，鄭麗文立委講的死800外人算作啥？
咱用世界防疫模範生的以色列作例來看，以色列人口920萬，咱台灣人口是in的2.6倍，三月十五為止，以色列疫情死亡人數是10,392個人，若照人口比例算起來佇台灣tio̍h死27,019個人，鄭麗文立委講的死800外人算作啥？
因為鄭麗文立委那像曲盤跳針一直講「台灣疫情死800外人」，咱才會用香港、以色列作例，講死800外人算作啥？其實因為疫情失去生命的每一個人咱攏會足m̄甘。但是若看世界，咱tio̍h會koh khah感謝陳時中部長所領導的衛福部kah全國千千萬萬為防疫拍拼的朋友，才會táng保持現有的成績，啥物款成績？到三月十七為止，二十工無人因為疫情死亡、一直保持死亡853個人。
咱佇chia，向所有為防疫工作拍拼的女士先生說多謝！