十一月十三，中國國民黨公布不分區立委名單，黨主席吳敦義hō͘人罵kah臭頭，緊講名單會作調整。十一月十五，調整了的名單無啥物新意，m̄-nā各界砲聲無斷，連in前黨主席、新北市前市長朱立倫mā怨歎講：「我所有的朋友攏mā罵聲連連，幹聲連連！」主要是列佇不分區立委第四名的退伍將軍吳斯懷，伊去中國乖乖聽習近平訓話、徛起來唱中國國歌，公然教伊嘴裡所稱呼「咱的」中共人民解放軍按怎kah美軍相戰。吳敦義主席的作法，hō͘人看tio̍h原本是「藍的」中國國民黨煞變作「烏tò͘紅」、紅kah出血。若照以前中國國民黨得tio̍h的政黨票有十四、五名立委的機會，吳思懷一定會當選中國國民黨的不分區立委。伊若入去立法院的國防委員會，按呢咱猶有啥物國防機密咧！Beh按怎才好？
好佳哉綠黨佇面冊提出一個妙計，in算出2020年選舉，中國國民黨政黨票若是比159萬票khah少，吳斯懷tio̍h無法度入去立法院。Mai按呢烏白亂想，beh那有可能咧！中國國民黨上衰bái的2016年政黨票mā the̍h tio̍h 328萬票、不分區立委分tio̍h十一席。綠黨卻用十一月二四，香港四年選一遍的區議會選舉結果來鼓勵逐個。經過chi遍「反送中」運動了後，超過71%破紀錄的投票率，香港區議會的選舉結果啥人mā預料bē到，一向強勢的「建制派」－tio̍h是倚香港政府、北京政府的hit派議員，原本有299席，chit遍減少241席約80%、chhun 58席；泛民主派原本干單有125席，chit遍增加263席約210%、變作388席。綠黨有kā算出來，2020年中國國民黨的政黨票若比159萬票khah少，in的不分區立委干單有三席niā-niā，排佇第四名的吳斯懷tio̍h bē tang入去立法院！綠黨呼籲逐個用選票來kā吳斯懷擋佇立法院外口。咱koh khah謳咾綠黨無私心，in干單拜託逐個政黨票mài tǹg hō͘中國國民黨，in並無拜託逐個政黨票tǹg hō͘綠黨。
十一月二五，綠黨佇面冊表示，中國國民黨總統參選人韓國瑜舊年選前有幾若遍家己講：「海內外捐款那像落雪按呢飛來」，但是綠黨有去查舊年的政治獻金資料，發現韓國瑜並無啥物海外捐款。綠黨質疑韓國瑜恐驚已經有違反tio̍h政治獻金申報相關的規定。所以決定十一月二六beh去監察院檢舉。因為根據《政治獻金法》的規定，禁止外國人捐款，若違法去收外國人的政治獻金，上懸會tàng處五年以下有期徒刑，僑居海外的人mā一定tio̍h有中華民國國籍才會使捐款。綠黨強調，若m̄是韓國瑜烏白噴雞kui，tio̍h是韓國瑜陣營並無依法申報捐款，可能已經違反tio̍h相關法規。
綠黨最近所表現的chit兩項代誌攏誠súi氣，會堪得大大kā謳咾！