一月十三下晡，行政院長蘇貞昌召開臨時行政院院會，照慣例完成內閣總辭，蔡英文總統隨時批示：「蘇院長政績誠好，展現施政效能，tio̍h繼續領導行政團隊，來面對各項內外挑戰，特別kā伊慰留。」總統府發言人講，為tio̍h選後政局穩定，政府施政會tàng接續，總統府kah行政院今仔日緊緊完成內閣總辭kah慰留程序，向（ǹg）望蘇院長繼續帶領行政團隊，繼續展現高效率、人民感受會出來的施政，無辜負人民的支持，積極回應人民的期待。蘇貞昌院長表示，感謝總統過去一年來對伊的信任kah對行政團隊的肯定，所有內閣成員攏會留任，伊會繼續領導行政團隊，落實總統的政見。
選前一個月左右，蔡英文總統tio̍h已經kā行政院長蘇貞昌明確拜託講「五二○以後猶原beh拜託你」。一月十一選舉hit工，蔡英文總統有kah蘇貞昌院長約好十三佇官邸見面。一月十三hit工，蘇院長照約定時間去到總統官邸，抵抵beh踏入門口的時，發現蔡總統徛佇門口迎接伊，蘇院長驚一tiô問講：「我遲到是bo̍h？」蔡總統笑笑仔應講：「我特別出來迎接你，表示感謝！」蘇院長向蔡總統報告：「若需要我做到叼一個時間點，請總統直接講。」蔡總統應講：「無chit-ê問題！tio̍h是beh拜託你繼續做！」蔡總統kā蘇院長確認，五二○以後請伊繼續留任。
2018年十一月二，台灣九合一大選，民進黨輸kah塗塗塗，2019年一月十三，蘇貞昌臨危受命擔任行政院長，伊無第二句話，決定「衝衝衝」！那像hit支「衝內閣一周年，有政府會做事」影片所講的：一月接任行政院長，繼續衝！二月，校舍耐震改善，邁進最後一步。三月，安居緝毒，chhau出毒品五點二噸。四月，第N次去機場巡豬瘟防疫。五月，推動婚姻平權。六月，歐盟漁業黃牌，成功解禁。七月，撤銷政治受難者有罪判決5,837人。八月，頒發金鼎獎特別貢獻獎，hō͘兒童繪本作家幸佳慧。九月，高鐵南延屏東。十月，開放山林，向山致敬。十二月，「南迴改」通車，載第一線人員做通車巡禮。繼續衝，繼續拚，國家繼續向前行。對蔡總統會tàng順利當選連任貢獻誠大。
十一月，行政院長蘇貞昌有一站顏面神經麻痺，醫師診斷是因為過頭疲勞致使病毒感染所引起。蔡英文總統隨時命令伊tio̍h歇睏。十二月初一，蔡英文總統連任新北市競選總部佇板橋成立大會，身體有khah好的蘇院長拚起去台仔頂向逐個會失禮，講：「我實在是teh拚老命，衝kah嘴歪去！」hông聽tiioh足m̄甘！
拜託蘇貞昌院長，衝衝衝，身體mā tio̍h小顧一下！