韓國瑜講啥話無經過大腦？列兩條仔出來hō͘你參考：
高雄市長韓國瑜就任前就任後，一再強調伊上蓋關心教育注重教育。若有影按呢，是按怎送去市議會審查的民國109（也就是2020）年度總預算，教育預算419億比舊年度減列6億，顚倒比舊年度減3%咧？
舊年競選高雄市長的時，韓國瑜講beh去高雄市管轄的太平島挖石油。今年九月二三，高雄市長韓國瑜chhōa首長向議會做「109年預算案籌編情形說明」的時，民進黨市議員高閔琳針對韓國瑜的競選政見，問講挖石油的預算佇叼位？韓市長應講：挖石油是講siáng講的、我有白紙寫烏字嗎？十月十六開始，高雄市長韓國瑜請假三個月投入總統大選，頭一工來到屏東縣潮州三山國王廟，廟董事長楊耀輝忽然間主動問起「太平島挖石油」hit件代誌，koh講若挖tio̍h石油，無定tio̍h以後學生仔讀冊攏免繳錢，害韓市長大嘴開開bē曉應。按呢韓國瑜tio̍h知影挖石油hit句話是siáng講的。十月二九下晡，中國國民黨總統參選人韓國瑜來彰化縣和美福德宮參拜了後，peh起去廟寺搭的舞台致詞，韓國瑜講：「台灣四箍圍攏是海，啥物mā無，石油、石炭、鑽石、黃金啥物mā無。
十月二五，中國時報發行人、旺報社長黃清龍佇伊的廣播節目「POP撞新聞」中罵韓國「活佇戒嚴時代」，講韓國瑜：「你chit-ê人tio̍h是m̄讀冊！Tio̍h是草包！」韓國瑜有講「故宮一次展出」，黃清龍直剖：「你有頭腦抑無？」「你那會主張講，你若當選總統你beh kā故宮所有的寶物一遍展出？你beh展出是beh展現啥物？Tio̍h是beh展現講『哇！阮有偌濟國寶』是m̄是！這是完全無常識！」我會使按呢講，韓國瑜，你想beh做總統啊？我想，有一點仔腦筋的人攏bē同意！」
黃清龍先生的想法是：「有一點腦筋的人攏bē同意韓國瑜做總統。」無同意上簡單的方法是mài選hō͘伊。黃清龍先生問韓國瑜：「你有頭腦抑無？」Hō͘咱小可驚一下，咱根本無先查清楚，韓國瑜到底有頭腦抑無，有人tio̍h怪韓國瑜講話無經過頭腦，萬不幸經過證明，韓國瑜根本無頭腦，咱硬要求伊講話tio̍h經過大腦，實在講有khah勉強！