咱頂遍有講，《港版國安法》第三十八條kah第三十六條規定，無管你是m̄是香港人，mā無管你是m̄是人佇香港，in認定你有做出違反《港版國安法》內底所提的危害香港國安的行為，你若有入境中國、香港，抑是坐tio̍h有佇香港註冊的船隻抑是飛機，抑是過境中國、香港，攏有可能hông in掠去。所以咱講Chit-ê《港版國安法》會使講是包山包海、管到全世界、管所有的人。咱講，設使一個美國人佇美國國內喝支持台灣獨立，mā已經犯tio̍h《港版國安法》，伊若去香港抑是中國，抑是坐tio̍h香港註冊的船隻抑是飛機，抑是過境中國、香港，攏有可能hông in掠去。咱講chit-ê比喻m̄是講sńg的。美國國務卿龐白奧（Mike Pompeo）講伊無法度接受chit-ê法，「而且chit-ê法是對所有國家的一種侮辱」。
七月三十一，「香港版國安法」發布滿一個月，香港警方正式以牽涉違反香港《國安法》發布通緝令，beh掠前幾工才佇英國kah美國國務卿龐白奧會面的香港眾志創黨主席羅冠聰、「香港獨立聯盟」召集人陳家駒、「學生動源」成員劉康、向英國申請政治庇護成功的前英國駐香港總領館雇員鄭文傑、「民主前線」前成員黃台仰以及美國華盛頓「香港民主委員會」總監朱牧民。朱牧民講我是一個已經移居美國二五年的美國公民，香港警方竟然發通緝令beh掠我？除了朱牧民一個是美國人無法度引渡以外，其他五個人，香港政府攏會使通過香港政府kah各國之間所定的「引渡條約」抑是協議，要求各國kā香港警方通緝的人引渡轉去香港。香港認定犯罪beh通緝的人，若用引渡條約，全世界走都無路！
好佳哉，各國政府目睭peh真金，隨時作出足súi氣足適當的反應：七月初三，加拿大宣布暫停kah香港之間的引渡條約，而且禁止向香港出口敏感軍事物品。中國駐加拿大大使罵講che明明是草猴想beh擋車；七月初九，澳洲總理莫里森（Scott Morrison）宣布，暫時停止執行kah香港、中國當局的引渡協議；七月十四，芬蘭政府宣布kah香港之間的引渡協議今仔日起無適用。七月二十，英國「隨時、無限期」暫停kah香港的引渡條約。七月二八，紐西蘭宣佈，因應港區國安法實施，紐西蘭暫停kah香港引渡協議。中國駐紐西蘭大使館發言人表示強烈不滿kah堅決反對。七月三十一，德國外交部長馬斯（Heiko Maas）宣布決定中止kah香港的引渡協議。中國駐德國大使館批評講，德國按呢做違反國際法kah國際關係的基本準則，「粗暴干涉中國內政」。八月初三，法國外交部發表聲明，表示bē批准kah香港之間的引渡協議。
香港beh通緝全世界in看無合意的人，免想！