聽講「霸王寒流」ùi北極落來會足寒。阿文想起舊年新曆過年，爸爸媽媽chhōa伊去「台北動物園」參觀kah足歡喜，煞hō͘伊想起「台北動物園」hiah-ê動物看beh按怎？媽媽安慰伊講：無問題。動物園內底，有的動物原本tio̍h是生活佇寒帶地區，愈寒in顚倒愈歡喜，但是台灣的熱天in會擋bē-tiâu熱kah真艱苦；有的動物原本tio̍h是生活佇溫帶地區，小可khah寒抑是小可khah熱猶有法度適應；有的動物原本tio̍h是生活佇熱帶地區，小熱大熱in攏活kah誠好勢，但是若小可khah寒in tio̍h真歹過日，大寒in當然無法度適應。阿文誠煩惱緊問講按呢beh按怎？媽媽講：免煩惱。「台北動物園」有專人替in設法照顧。
原來2020年十二月三十中晝，「台北市立動物園」有發佈一條新聞講，真濟人非常關心忽然間大寒，對園裡的動物有影響無？「台北市立動物園」beh kah逐個分享動物的各種禦寒措施，有地熱、燒氣，照燈火、麻布袋、焦草、薑粉kah薑湯等等，外用內服的攏總有，hō͘所有驚寒的動物，攏會tàng佇一波一波直直來的寒流中平安度過，請逐個放心免煩惱。
因為野生動物kah人類無仝，bē-tàng等到真正感覺寒，才開始beh chhōe
khah厚khah會燒的衫來穿。Tī冬天猶未來進前，「照養團隊」tio̍h會開始一步一步增加部分動物逐工的食物份量，像講食肉的大型貓科動物，冬天增加的食物量，比熱天平均加50%；有的食量較細的動物，可能無法度tī短時間內大量進食，tio̍h提供其他熱量khah懸的替代食材，hō͘ in 會tang儲存夠額的脂肪，才有法度安穩度過寒天。保育員mā會tī適當的時間拍開戶外活動場通往室內欄舍的門，hō͘各種動物家己選擇beh佇戶外活動抑是入轉去溫暖的內舍khah bē寒。
看電視新聞報導，中國有八成以上的所在tī 2020年底到2021年初chit站氣溫會落到０度以下，koh報導講佇特別寒的時陣，歸個中國攏欠電。Ùi 2004年開始，中國送燒氣改用“gá-suh”、無koh用燒土炭。中國的“gá-suh”公司公告，ùi 2020年十二月二九至2021年一月初一，也tio̍h是上蓋寒chit幾工大樓停止供應“gá-suh”。因為中國的“gá-suh”有四成是ùi澳洲進口的，kah澳洲無相好，無beh向澳洲進口，中國的“gá-suh”ùi 2020年十一月初、一噸人民幣4,000外元，到十二月底、起到一噸人民幣9,000外元。欠“gá-suh”，會tàng用原本製造“gá-suh”的土炭來代替，mā因為中國kah澳洲兩國關係無抵好，無愛買澳洲的土炭，有幾十隻載澳洲土炭的船停佇中國港外，中國tio̍h是不准in入港卸貨。
阿文問媽媽，中國人chia呢寒beh按怎？