Bat看過《西遊記》chit本冊的人，攏一定對孫悟空頭殼頂hit頂「會變ân的頭箍」印象誠深。奉命一路保護三藏去印度取經的孫悟空武藝高強，但是若小可無順三藏的意，三藏tio̍h會隨時唸「ân箍咒」：“om-ni-bei-mei-hóng”，伊愈唸頭箍tio̍h會愈ân，孫悟空的頭tio̍h會愈疼，疼kah叫m̄敢。原來觀音如來佛知影孫悟空愛sùi，the̍h一頂花帽仔siâⁿ伊，孫悟空看tio̍h隨時the̍h起來戴，伊當然m̄知影帽仔內底藏一個「會變ân的頭箍」，戴落去的時無特別感覺，一旦戴落去tio̍h剥bē落來。
1971年十月二五，第26屆聯合國大會頂面，就Alupania等23國提案「恢復中華人民共和國佇聯合國組織中的合法權利問題」進行表決，聯合國大會第2758號決議，通過的決議內容重點是：承認中華人民共和國政府是中國佇聯合國組織的唯一合法代表，而且隨時kā蔣介石的代表ùi伊佇聯合國組織kah所屬一切機構中所非法占據的席位趕出去。自按呢，中國對台灣家己戴的hit頂「中華民國」「會變ân的頭箍」足歡喜，中國若bē爽，伊tio̍h唸「ân箍咒」：“chi̍t-ê Tiong-kok”，台灣頭殼tio̍h疼死，bē-tàng佇國際社會伸腳出手，bē-tàng參加聯合國相關的國際組織，真濟國家m̄敢kah台灣建交。
美國時間四月十九，由美國眾議院外交委員會亞太小組民主黨籍主席Bela（Ami Bera）、共和黨眾議員Khò-ti-su（John Curtis）、眾議院「國會台灣連線」四位共同主席Siah-pò（Steve Chabot）、Silesu（Albio Sires）、Tia-Pá-la̍t（Mario Diaz-Balart）kah Kon-no-li（Gerald Connolly）共同提出「台灣國際團結法案」，法案指出，聯合國第2758號決議並無處理台灣kah台灣人民佇聯合國抑是周邊組織代表權的問題，mā無佇中華人民共和國kah台灣關係頂面採取啥款的立場，抑是包含任何有關台灣主權的聲明。法案表示，美方反對任何無台灣人民同意下，試圖改變台灣地位的倡議；法案以「國會意見」表示，美國政府應該鼓勵盟友同伴，反對中國削弱台灣kah邦交國、非邦交國的關係。法案要求美國國務卿tī年度報告中，詳細講中國過去、現在佇國際組織中，有做啥物削弱台灣會員抑是觀察員身分的作為。
聯合國第2758號決議字頭字尾攏無講tio̍h台灣kah台灣人民，咱應該趕緊家己剥掉「中華民國」hit頂「會變ân的頭箍」。中國若koh唸「ân箍咒」:“chi̍t-ê Tiong-kok”，kah咱台灣、台灣人無關係，頭殼bē疼，台灣會足輕鬆。
咱早早tio̍h應該kā「中華民國」hit頂「會變ân的頭箍」剥掉！