2019年底的武漢肺炎傳到全世界攏tio̍h災。真濟科學家趕緊beh研發武漢肺炎的疫苗。Chit-ê病毒傳染足緊、害死真濟人，“WHO”kah各國政府發出「緊急使用清單」，允准疫苗生產公司的tī第三階段試驗tio̍h會tàng那做試驗那販賣疫苗。真濟好額國緊the̍h大把錢向疫苗廠商大批訂購疫苗，預訂疫苗數量有濟kah全國民人注五遍的，但是有koh-khah濟國家根本無錢thang買疫苗。
一個叫作“COVAX”的機構成立，計劃2021年二月開始分發疫苗hō͘ 92個
散鄉國家kah幾十個中等收入國家。“COVAX”的目標是到2021年底會tàng向
全球配送至少20億劑疫苗，hō͘低收入國家有20%人口會tàng注tio̍h疫苗。錢
咧？募款。各國政府捐獻，英國政府捐7.34億美金，日本捐10億美金，到六
月初三為止，募款的總金額已經達到96億美金。“COVAX”的想法是，世界上
若有人無機會注疫苗，in會艱苦心，che tio̍h是人道主義的精神。
六月三十，美國白宮發言人莎琪（Jen Psaki）指出「美國有注意tio̍h台灣beh the̍h tio̍h疫苗的途徑hông截（cha̍h）斷」。六月二十美國捐贈250萬劑疫苗運到台北，當然有「制衡中國操作空間」的意思。Mā是出佇人道主義的精神。六月初六，日本外相茂木敏充宣布第二波追加贈送台灣的AZ疫苗，會tī七月初八送出，數量是113萬劑，加上六月初四捐送的124萬劑，合計237萬劑。伊講tī十年前的日本東北大地動，台灣第一時間捐助善款hō͘日本民眾相當感心，所以當台灣面臨困難的時，日本mā「義不容辭」（gī-put-iông-sû），意思是講道義上bē-tàng推辭提供疫苗支援，向望會tàng幫贊台灣防止疫情擴大。
六月初九，中國「中央電視」講台灣接受美、日疫苗的援助，是「國際乞食」。台灣的中國國民黨有甘願作中國共產黨僚儸的，緊tòe in頭家講台灣是「疫苗乞食」。舊年二月武漢肺炎佇中國大流行的時，日本捐送中國防護嘴掩633萬個、手套104萬副、大型CT檢測設備1台（約300萬元人民幣），koh有防護服、隔離衫等等。這是人道行為，有人性的無人會講中國是乞食。
孟子講：有一個人看tio̍h一個細漢囝仔行倚去古井邊，tio̍h趕緊去kā抱離開，並m̄是chit-ê人kah chit-ê細漢囝仔的父母有熟似，mā m̄是為tio̍h beh hông謳咾。只是因為人攏有「惻隱（chhek-ún）之心」，tio̍h是對別人遭遇不幸會產生同情心、會m̄甘。孟子講，人攏有惻隱之心，無惻隱之心的m̄是人。
會罵接受援助的人是乞食，可見in無惻隱之心，當然m̄是人。咱若深入看代誌，會發現：M̄是chit黨kah hit黨的無仝，是人kah m̄是人的差別！