七月初一早起，中國國民黨文傳會主委王育敏提出三點強烈呼籲，包括政府應該隨時停止歧視作為，ùi親情、人道考量，開放無台灣籍佇中國大陸的台灣人子女專案申請轉來台灣。Hō͘家庭團圓，政府tio̍h列出時間表，bē使koh hō͘ in遙遙無期的等待，而且蔡政府應該遵守「聯合國兒童權利公約」精神，停止kā人權chit台車倒退lu的差別待遇。
中國國民黨文傳會主委一直講政府tio̍h愛按怎，bē使按怎，講kah那像咱的政府chiah呢薄情、無血無目屎。事實上敢是按呢？咱應該先瞭解in所講的、一般所稱呼hiah-ê「小明」是啥人？
簡單講，「小明」有三種人：第一種是，台灣翁婿chhōa中國某所生的囝仔，照國籍法應該有台灣籍，但是chiah-ê囝仔雖然佇中國出世，但是佇台灣tòa真久，卻無台灣戶籍。那會按呢？因為囝仔出世的時，父母kā in選擇中國籍。有幾種理由，將來囝仔大漢會tàng繼承in老母後頭厝的財產；另外一種考慮，the̍h中國籍將來beh佇中國讀冊做工課發展事業加真方便；the̍h中國籍佇台灣免作兵。橫直生活佇台灣仝款會tàng享受台灣的健保醫療等等。Chiah-ê未成年的囝仔，因為the̍h中國籍，tòa佇台灣屬「特殊長期居留」身分。第二種是台灣人娶的中國某，隨時會tàng入台灣籍，但是伊to̍h堅持無愛入台灣籍。第三種是台灣人娶中國某，chit-ê中國某kah中國籍的前翁所生的子女，tòe老母來tòa佇台灣但是猶未the̍h tio̍h台灣籍。有可能「小明」chit遍過年轉去中國看外公外媽，因為武漢肺炎疫情煞無法度koh來台灣。第一種上蓋濟的「小明」，衛福部長陳時中有講，當初替囝仔選擇國籍，有百分之百的自由，作父母的tio̍h家己承擔後果。
七月初一，中國國民黨文傳會所講的，kah六月十八，中國國台辦發言人朱鳳蓮所講的完全仝款，攏是講民進黨當局一直針對ùi中國轉去台灣的部分台胞、佇台灣讀冊的中國學生kah兩岸婚姻家庭子女，刁工採取歧視性措施。In攏夯「聯合國兒童權利公約」精神來kā咱指責「歧視」。借問一下，咱叼一點歧視in？
Koh khah好笑的是，中國國民黨大陸事務部主任左正東講，舞政治bē使無人性，蔡政府那會tàng忍受hō͘國民骨肉分離？Hiah-ê「小明」m̄知影家己做啥物m̄-tio̍h，是按怎tio̍h kah父母分開？蔡政府嚴重傷害tio̍h囝仔的自尊而且hō͘ in產生hông放捒的感覺。囝仔無m̄-tio̍h，Hiah-ê「小明」可能m̄知，但是in-ê父母足清楚，骨肉分離明明是in家己造成的，beh怪啥人？
台灣人m̄作，堅持beh作中國人，chit-má才變作「小明」。Siáng造成的？