台灣藝人歐陽娜娜tī今年十月初一中華人民共和國《央視》國慶晚會頂面，講家己是中國人，kah其他中國藝人合唱「我的祖國」，伊敢知影伊所唱的「我的祖國」下面，有偌濟中國人民當teh受難受苦？
Ùi舊年十二月tio̍h發生的「武漢肺炎」，chit-ê「祖國」放hō͘伊爛，無beh好好做預防做治療做管理，掩蓋疫情無向「世界衛生組織」（WHO）照實報告。一直到疫情bē收煞ah，才tī一月二三透早宣布武漢封城。照武漢市長講的，tī封城進前，已經有五百外萬人驚kah走離開武漢。致使真緊，全中國無一個省市自治區無染tio̍h武漢肺炎。上濟的是走去廣州、香港，飛去世界各國，武漢肺炎四界òe四界傳。到十月初一「祖國」國慶進前，全世界已經有3,301萬8,877人染tio̍h武漢肺炎，因為武漢肺炎不幸死亡的已經超過100萬人。Chiah-ê武漢肺炎的患者kah死去的冤魂，攏是歐陽娜娜所唱的「祖國」所致蔭的。
續落去是長江流域大雨幾十工無停，水災ùi四川重慶開始，連邊仔的貴州省mā大水連連，長江上游的水愈淹愈懸，中國工程上偉大的「三峽大壩」，那像手內掠一隻鳥仔tēⁿ驚死、放驚飛。三峽大壩若放水，驚長江下游幾省幾億的人民受水災之苦，三峽大壩若無放水，驚四川重慶會做koh khah大的水災，萬不幸三峽大壩若接載bē-tiâu piak孔，長江下游幾億的人民隨時變作「人底亡魂」。歸個江南淹大水猶未煞，大雨往北徙去黃河流域，mā是四界作大水。大雨大水上驚人的是土石流，山崩厝倒人民的財物tòe水流。那像「我的祖國」所唱的有影是「讓那河流改變了模樣」。M̄-nā長江流域、黃河流域、連雲南、廣東、福建，甚至連東北的烏龍江mā作大水，水災hō͘ 27省（市、自治區）造成近3,400萬人受災害，致使141人死亡。因為武漢肺炎kah水災，致使全中國夏糧絕收、秋糧減產，其他農作物mā無可能有啥收成，農民beh哭無目屎。
舊年「非洲豬瘟」流傳到中國，無法度防止阻擋，豬仔死一phiàn，今年中國人無豬肉thang食，準有mā貴死人！今年草蜢侵入，雲南省有10萬畝田地hō͘草蜢食kah臭青荒，連東北的黑龍江mā爆發足大的草蜢災。 中國的經濟發展的基礎，真濟是建立佇thiau工放目出在人民污染空氣、土地、水質水量。中國是世界溫室效應氣體（GHG）上大的排放國；中國工廠排放大量有水銀成分的「甲基汞（hōng）」污染海裡的生物。非法販賣野生動物的大國，糞埽無好好分類處理等等，攏是破壞地球環境的兇手。 歐陽娜娜kah人唱「我的祖國」，伊敢知影祖國下面的中國人民受啥苦難？
(201002)