十二月十八，四大公投結果中國國民黨攏輸，黨內tio̍h有人開始teh
「chhōe戰犯」。講是鋼鐵韓粉、資深音樂人劉家昌歸個人崩去、大聲罵講，「侯友宜m̄是叛徒，啥物才是叛徒？」砲轟朱立倫「chhōa一群漢奸，siáng會跟你做戰友？」伊呼籲為tio̍h私利無顧黨國的侯友宜kah盧秀燕tio̍h kā 開除掉，koh點名高金素梅、江啓臣分別選新北市kah台中市長。伊講「2024是中華民國kah台灣獨立最後的決戰」，伊呼籲郭台銘董事長，出馬替阮解心願。「國民黨若beh愛和平統一，tio̍h先hō͘台灣少年人知影家己是叼一國的人」。
台灣人已經真久無聽tio̍h「漢奸」chit-ê罵人的語詞。會記得作囝仔的時陣，逐工tio̍h愛唱一首「反共抗俄歌」：「打倒俄寇，反共產反共產；消滅朱毛，殺漢奸殺漢奸。」囝仔人知影啥物「漢奸」咧？大漢了後去chhōe資料才知影，oh！原來tī五千年悠久歷史內底，「漢奸」算是一個真糼齒的名詞，滿仔拍入關統治歸個當時的中國，建立大清帝國了後，滿清統治者主張家己kah漢人利害相通；mā是有漢人認為滿清的利益tio̍h是漢人的利益，致使有真濟人kā滿漢看作一體。見若違背in的利益的人攏叫作「漢奸」，意思是通敵人的人。大清帝國統治中國276年（1636—-1912），猶原有真濟親像孫中山chit款人，認為滿仔kah漢人並m̄是一體，所以伊革命的宗旨有一條是「驅逐韃虜」，韃虜原本是指中國大陸北方蒙古、女真等遊牧民族，當然m̄是漢民族的人。
中日戰爭中，倚日本侵略者抑是倚日本人所扶持的所謂「偽政權」的人，證據充分的，攏總稱呼作「漢奸」，抗戰勝利了後，hiah-ê「漢奸」攏tio̍h受審判定罪。
蔣介石kah中國國民黨政府hō͘中國共產黨拍kah走路來台灣，當然對當時佇毛澤東、朱德領導下的中國共產黨恨到入骨；對佇後壁唆使kah支援的蘇聯共產黨罵作是「俄寇」，「寇」是賊仔土匪。聽講阮囝仔時代所唱的hit首「反共抗俄歌」歌詞是蔣介石寫的，咱會tàng理解伊那會罵人「漢奸」。
現此時佇中國，九十一歲的資中筠（kun）女士，是一位真受尊敬的公共智識分子，伊bat擔任過中國社會科學院美國研究所所長。伊講：對無仝款意見的人to̍h罵伊是「漢奸」，「漢奸」chit-ê 詞煞變作「國罵」，kā「漢奸」chit-ê 詞加佇意見kah我無仝的人身上，mā是「中國特色」、而且是現在的「中國特色」。按呢，咱tio̍h知影原來劉家昌離咱台灣偌呢遠。
今仔日佇台灣，有幾個人關心：「漢奸」是啥物碗糕？ (211231)