中國一直講i根據古早的「九段線」為準，講菲律賓、馬來西亞、汶萊kah越南等南海各國的部分領海kah專屬經濟區kah公海，攏是in的。咱笑中國是褪褲圍海。菲律賓認為近年來中國已經違反《聯合國海洋法公約》，向仲裁法庭提出要求仲裁，2016年七月十二，仲裁法庭裁定佇《聯合國海洋法公約》下面中國對南海自然資源無享有「九段線」的歷史性權利。中國拒絕接受仲裁。
六月十三，中國外交部發言人汪文斌，佇例行記者會講，台灣是中國領土不可分割的一部分，台灣海峽上狹（e̍h）的所在約70海里，上闊的所在約220海里。根據《聯合國海洋法公約》kah中國國內法，中國對台灣海峽享有主權權利kah管轄權。汪文斌講，《國際海洋法》頂面根本無國際水域的講法，有關國家講台灣海峽是國際水域，是為tio̍h beh操縱涉台問題，威脅中國主權安全所製造出來的藉口，中方對chit點堅決反對。
汪文斌講，「《國際海洋法》頂面上根本無國際水域的講法」，聽起來那像無m̄-tio̍h，但是伊是tèⁿ青，逐個攏知影「國際水域」tio̍h是「公海」非正式的用語。好，咱講「公海」。咱國頭一任駐“WTO”大使顏慶章表示，根據1982年聯合國所訂的《海洋法公約》內容精神，領海以外的海域攏總屬「公海」。「領海」是啥？領海是指ùi海岸基線算起12海浬內的海域。該公約原則上包括軍艦在內的外國船隻攏會使佇沿岸國的領海「無害通過」。若照按呢，倚中國陸地12海里內的海域，kah倚台灣12海里內的海域以外的台灣海峽，攏總是「公海」。按呢咱tio̍h知，台灣海峽大部分是屬「公海」。國際法「公海」的基本精神是「公海自由」，tio̍h是講「公海」是無主人的物件，逐國的任何船隻攏會使自由航行，bē-tàng用任何方法防止抑是阻擋公海的使用權。
台灣海峽上狹（e̍h）的所在約70海里，上闊的所在約220海里。也tio̍h是講台灣海峽上狹（e̍h）的所在有58海里kah中國無關係，內底有12海里是台灣的領海、46海里是「公海」；台灣海峽上闊的所在有208海里kah中國無關係，內底有12海里是台灣的領海，有196海里是「公海」。干單以最近三年來講，美國軍艦通過台灣海峽假那teh行灶腳：2020年13遍。近14年來上濟的一年，2021年平均每個月有一遍，2022年到六月十七日為止只有3遍，美國明明teh表示，台灣海峽是公海，任何國家的任何船隻攏有佇chia航行的自由。中國講「對台灣海峽享有主權權利kah管轄權。」真正m̄驚笑破人的嘴？
中國按呢講，m̄是beh koh褪褲圍海，無是啥？