最近有一位去中國投資，舞kah滿面全豆花轉來台灣的生理人怨歎講，1989年北京天安門事件了後，差不多所有的外國人攏停止佇中國投資設廠hit當時，中國共產黨對香港kah台灣的生理人特別好，希望港商kah台商會tàng去中國投資設廠，要求啥物條件攏總答應，對港商、台商會使講是好禮款待到「磕頭」的程度。起工場期間，頂頂下下攏來鬥相仝，政府的「領導」差不多逐工到。愛水有水、愛電有電，做khah無周全的所在，陪罪會失禮無停。等到工廠beh生產的時，幫忙募集職員工人，那像地方政府in家己的工課；等到正式生產了後，無論是陸上海上運輸、報稅過海關，逐項幫忙盡量hō͘咱方便。因為事實上咱出口比in加真有經驗，大部分攏是咱teh教in。
一兩年後，一寡外國公司mā koh走來中國投資設廠，m̄-nā日本、韓國、新加坡，連美國、英國、德國mā攏拼來。中國共產黨的態度tio̍h有小可改變，雖然猶原誠好，干單會使講是ùi「磕頭」改變作「tìm頭」。進入第二階段，頭起先in會假仙作思考的款講：「這個要研究研究」，咱一時聽無，想歸晡才知影伊是講愛送「煙」kah「酒」。一時之間各國來起的工廠tio̍h有百外間，工廠愈起愈大，工人愈倩愈濟。政府官員的胃口mā愈來愈大。有一年咱趕beh出貨去美國赴聖誕節，所有的手續攏辦好勢，海關干單m̄ tǹg印仔放行。Taⁿ tio̍h進入第三階段：「搖頭」，按怎講mā bē使，搖頭koh搖頭。一下仔才開嘴講：「這麼急的事為什麼不提前來講？」用手比三枝指頭仔。Oh，伊講「提前來講」是講「the̍h錢來講！」好lah好lah，三萬tio̍h三萬，貨出會出去khah要緊。
阮熟似咱台灣一間大公司的少爺，伊目睭peh無金，有一工kah市領導大細聲，嚷了伊tio̍h soan轉來台灣，第二工才聽講領導beh辦伊漏稅。萬一伊若走無離，有可能關kah伊頭毛嘴鬚白，甚至有可能無命，che tio̍h是中國共產黨的第四步：「斬頭」。
我才kah講，中國音樂家馬思聰，1949年中華人民共和國建國前，中國共產黨對伊扶扶tháⁿ-tháⁿ，建國了後拜託伊作頭一任的中央音樂學院院長。1966年文化大革命的時hō͘造反派批鬥，1967年一月才偷走到香港而後轉去美國。1987年五月佇美國過身。伊在生的時有來台灣幾遍，伊bat講中國共產黨上厲害的有四個頭：需要你的時會使對你磕頭，而後對你tìm頭，而後對你搖頭，上路尾掠你去斬頭。中國共產黨出chit四個頭是有伊悠久的傳統歷史！
中國共產黨出四個頭，舞kah你無頭！