2017年十月初《紐約時報》kah《紐約客》報導數十名女性講in遭受過美國電影公司大頭家、製作人溫斯坦（Harvey Weinstein）的性騷擾、性侵犯事件。影城的其他女性mā表示kah溫斯坦有過類似的經歷，伊自按呢hông譴責棄捒除名。十月十五，美國女演員彌蘭努（Alyssa Milano）佇“Twitter”頂面發起，鼓勵有仝款遭遇的人好膽講出家己的遭遇，用一個記號“#Me Too”（我mā是性騷擾、性侵犯的受害者）。兩工超過50萬人次的回應，佇「面冊」頂面二四點鐘內tio̍h有470萬人在1,200萬條狀態中提起“#Me Too”chit-ê標仔。
“#Me Too”真緊tio̍h傳到世界各所在，雖然傳到中國，mā有幾種中國譯名，用腳頭u想mā知影：佇一個無尊重人權的國家，那有可能注重女權咧？
一位「許艷」女士佇中國公安機關作「輔警」，位階真低，是下階層、散赤人做的工課。故事發生佇伊的故鄉江蘇省北部的灌雲縣，是散鄉的庄腳，舊年in鎮居民的年收入人民幣三萬元，是全國平均水準的三分之二。許艷女士2014年十九歲hit年hō͘一個派出所所長睏去，並無講有the̍h錢抑無。法庭的文件顥示，tī當局以「詐欺罪」kā掠伊起訴進前，許艷有ùi九個人the̍h tio̍h人民幣三百七十二萬六千元，其中有八個人是官員。舊年十二月地方法院判伊有期徒刑十三年、勒令退回hiah-ê錢以外，tio̍h koh交罰款人民幣五百萬元。許艷女士的案才大大佇網路頂面出名，因為法庭的文件kā伊描寫kah那像是一名的妖姬會威脅查埔人。法庭的文件中有列出chiah-ê查埔人的姓名，列出一名灌雲縣公安局副局长、三名派出所所长、兩名病院官员kah一名小學校長。
網路討論的人愈來愈濟，基本上kah美國“#Me Too”的想法無仝，討論的人大多數是徛佇階級的立場講話，問講是按怎對一個散赤查某人tio̍h判chiah重罪，伊的行為那會使算是「詐欺」咧？硬kā二十外歲查某人睏去hiah-ê至少九個「霸王」是按怎攏無罪？已經知的「霸王」有八個是官員，in那會有hiah濟錢thang hō͘許艷女士咧？是按怎法院判伊tio̍h退回chiah-ê錢？敢講官員睏散赤
查某人會使免錢？Hông睏去的查某人有罪？Che是中國基層的貪腐。
今年一月初五，天津第二中級人民法院宣判前中國華融資產管理公司董事長賴小民死刑，一月二七執刑。佇伊厝裡的現金櫃仔內，搜查tio̍h兩億外的人民幣，chit-ê數額佇中國貪官內底排無陣。但是，伊有一百個情人，佇中國貪官內底無第一名可能mā排佇頭前。Che是中國高層的貪腐。
中國的官場ùi基層爛到高層，貪污淫亂的普遍實在是無藥醫！