最近網路一直傳一個消息講：今年六月十二，俄羅總統Phú-chin（Vladimir Putin）接受俄羅官報《真理報》採訪的時，預測中國的將來。伊講二十年後，中國會變作全世界上蓋散鄉的國家。伊講的理由是按呢：第一，Ùi申請移民的情況來看，中國有90%的大官家屬kah 80%的好額人已經申請移民，抑是有移民的意願。一個國家的統治階層kah既得利益階層，為啥物對家己的國家失去信心咧？ Hō͘人想bē曉。 第二，中國人無瞭解in應該對國家kah社會所承擔的責任kah義務。第三，中國人是世界上少數無信仰的可怕國家之一。全國頂頂下下唯一的崇拜tio̍h是權力kah金錢，自私自利。第四，人民大眾過去是權力的奴隸，演變到chit-má是金錢的奴隸。Chit款的國家beh那會得tio̍h別人的尊重kah信任咧？第五，大多數的中國人自了m̄-bat學過啥物是有體面kah有尊嚴的生活意義，干單知影得tio̍h權力抑是金錢tio̍h是生活的全部、tio̍h是成功。全民腐敗，墮落，茫茫渺渺的現象，tī人類歷史上早前無、將來mā無可能有的！第六，對環境的破壞完全無準節，搶奪資源那像起siáu。生活方式奢華浪費，m̄知tio̍h愛有幾粒地球才有夠in按呢phún！
咱干單講第一點，像講中國共產黨總書記習近平的大姐加拿大人、二姐澳洲人、小弟mā是澳洲人，中華人民共和國總理李克強的查某子美國人，全國政協主席汪洋的查某子美國人，作過兩任中國共產黨總書記江澤民的兩個子攏是美國人。好額人那會hiah濟走出國？因為好額人kah政府官貝khah有交陪，消息比一般百姓khah靈通。最近美國金融犯罪執法網路公佈：德意志銀行、滙豐銀行、渣打銀行、摩根大通銀行、紐約梅隆等五間銀行，干單今年tio̍h洗錢美金2兆（差不多新台幣58.78兆），chit五間銀行kah中國紅二代關係誠深誠好。中國文化學者易中天講：「一個國家的知識精英kah財富精英若攏走出國，猶有啥物留佇hit-ê國家？Chhun愚戇kah散鄉niā-niā。」
Chit-ê新聞到底是真的抑是假的？當然是假的。因為仝款chit-ê內容，2013年tio̍h傳一遍過ah！Hit遍傳的是美國國務卿Hilalei（Hillary Clinton）佇一間大學的演講。逐個明知chit-ê新聞是假的，那會hiah濟人會一傳再傳，傳bē-siān咧？雖然講chit六點內容是謠言，那會kah現實的中國講kah hiah對同咧！
咱會tàng預測，tī中國猶未變作全世界上蓋散鄉的國家進前，chit-ê假新聞大概七、八年tio̍h會koh流傳一遍，雖然講chiah-ê內容的主人可能會換作法國總統、英國總理、抑是印度總理，總是chit六點現象無變，一直流傳一直流傳，無流傳到有一工，中國有影真正變作全世界上蓋散鄉的國家bē煞！ (200925)