台灣的武漢肺炎本土案例進入五月忽然間增加真濟、真緊。台灣有人一直喝講tio̍h買中國疫苗。五月二六，中國國台辦發言人朱鳳蓮問講，對世界衛生組織認可的中國疫苗，中國有beh捐hō͘台灣，台灣到底愛抑是無愛？陸委會直直講咱政府kah BNT德國原廠接洽採購疫苗，差不多接近完成簽約的時，因為中國介入阻撓，延遲到今仔日猶無法度簽約。Khah要緊的，咱應該hō͘逐個知影，中國疫苗的真實狀況，kah中國疫苗有偌呢恐怖。
中國疫苗主要有三種：第一種是中國科興疫苗（Sinovac），簡稱叫作「科興疫苗」，全世界有23個國家地區採用；第二種是國藥集團北京生物疫苗，簡稱叫作「國藥疫苗」（Sinopharm），全世界有37個國家地區採用；第三種是中國康希諾生物疫苗克威莎（Convidencia），特點是注一筒tio̍h會使，真少外國採用。照世界衛生組織專家的報告，中國三種疫苗的共同特色是，有身的查某人、60歲以上年長者kah有慢性病的患者，種了後的反應等安全性的證據無夠。
南美洲智利有買6,600萬劑的中國科興疫苗，二月初三開始注以來，佇全國1,900萬人口中已經有29%（551萬人）注第一劑，有15%（285萬人）注了兩劑，但是確診例顚倒愈濟。三月初，土耳其開始注中國科興疫苗，到三月二二，有超過800萬人注過第一劑，有500萬人注完兩劑，約佔土耳其人口的15%。到三月二一累計確診案例突破300萬，單日連續四工破兩萬例。引起土耳其人民相當不滿。中國提供hō͘巴西上蓋濟中國科興疫苗，但是巴西武漢肺炎死亡人數已經超過40萬人。四月二九。泰國女子排球隊隊員kah工作人員去注中國科興疫苗，五月十二，二十二個人去做賽前檢測，驗出攏總陽性反應。
中國國藥疫苗mā無好kah叼位去。四月初九新聞報導，菲律賓總統的126個隨身安全人員，靠勢tī舊年底tio̍h攏有注國藥疫苗，最近檢測全體確診。五月初五新聞報導，南非東部、人口十萬的島國西施亞，已經有六成民眾注過武漢肺炎疫苗，其中六成（三萬六千人）注中國國藥疫苗。最近一兩禮拜該國疫情升溫，有三分之一的重病病例有注過二劑疫苗。二月初四，匈牙利正式開放民眾大規模注中國國藥疫苗了後，卻變作全球武漢肺炎死亡率上懸的國家。
五月二十新聞報導，有五名前往越南考察的中國專家，轉去中國了後確診染病，chit五位專家出國前攏有注過中國國產疫苗，可惜無講叼一牌的疫苗。其中一名專家已經轉作重症患者，到五月十八伊一直有「小可呼吸困難」。
中國疫苗，無講你m̄知thang驚！Beh注中國疫苗的人請夯手。