中國hit旁koh teh hán講，tī今年美國總統大選期間beh武力統一台灣，亦tio̍h是十一月初三前後。咱khah好奇的是，中國講beh統台灣的理由是啥？
設使講台灣人生活了足可憐，中國人生活了足富裕，中國人同情台灣人，想beh kā台灣人ùi水深火熱中解救出來，講mā是一個理由。今年年初開始，武漢肺炎佇中國大流行、chia封城、hia封城，中國各省水災無斷、非洲豬瘟猶未煞、koh有草蜢仔群入境，一所在一所在食kah臭青荒，農民熱天欠收、秋天無收。中國無一個省市自治區的國民所得，會tàng kah台灣比phēng。今年中國兩會ùi五月二一至二八佇北京舉行，中國國務院總理李克強佇「兩會」記者會上講：「有六億人每個月的收入只有人民幣1,000元。」差不多是新台幣4,300元。咱台灣人一直過kah誠快活真好勢。中國講beh統台灣，憑啥物！
設使講佇專制獨裁的恐怖統治下面，台灣人過了誠無自由真痛苦，所以中國同情台灣人beh出兵武力統一台灣、解救台灣人，講mā是一個理由。咱看今年四月二一，「無國界記者」（RSF）的報告，世界新聞自由指數，台灣排名第43名，比舊年退步1名；中國排名第177名，是ùi後面算倒轉來第4名。台灣人過了自由自在，連空氣mā甜的。中國講beh統台灣，憑啥物！
設使講台灣的邦交國才chhun 14國niā-niā，台灣人出國寸步難行，中國邦交國有180國，中國會tàng幫忙台灣人出國旅遊做生理。免！咱國外交部講，「咱國的人會tàng免簽證前往的國家kah地區」，攏總有112個國家kah地區。Kah中國互相hō͘普通護照免簽證的有14國，單方面允准中國公民免簽證的有15國，鬥起來才29國，另外加上落地簽證的有42國，攏總mā才有71國。咱台灣人佇全世界行踏，比中國人加真方便。中國講beh統台灣，憑啥物！
設使台灣人攏足愛做中國人，為tio̍h beh hō͘愛做中國人的人攏會táng變作中國人，中國beh出兵統台灣，講mā是一個理由。真歹勢，今仔日佇台灣干單4%的人認為家己是中國人。Chit 4%的人若beh去中國做中國人，咱kā歡送，bē請in留步。96%的台灣人tio̍h是無愛做台灣人。中國beh統台灣，憑啥物！
設使中國講台灣自古tio̍h是中國神聖不可分割的領土，烏白講！台灣攏總hō͘
清國管過兩百十二年，hit陣中國kah台灣仝款mā是淪落作滿仔韃虜的殖民地。準講清國是中國，bat hō͘中國管過tio̍h會變作中國神聖不可分割的領土？按呢，中國bat hō͘蒙古管過，mā是蒙古神聖不可分割的領土？蒙古會使武統中國？
中國講beh統台灣，憑啥物！