七月初八，日本當地時間早起11點半左右，日本前首相安倍晉三（Abe shinzo）佇奈良市為in自由民主黨參議院議員候選人佐藤啓助選的時，有暴徒ùi伊後壁3公尺的所在kā彈銃，伊倒落去了後趕緊hông送去病院急救，下晡五點外tio̍h斷氣過身，享年67歲。
全世界各國各界聽tio̍h chit-ê不幸的消息，攏大tio̍h驚kah懷念m̄甘的時，獨獨中國kah人無仝款。聽tio̍h Abe前首相hông彈銃死亡的消息，中國有一寡商家那像是「特別歡喜」，開始作促銷活動，有一間賣奶茶的掛紅布條寫講：「慶祝安倍歸西奶茶買一送一，連續三工普天同慶」，有一間自轉車店推出「為慶祝安倍晉三hông piāng」送手套活動，Abe前首相hông暗殺的消息傳到中國了後，隨時佇中國的網路社群引起大量的討論，到下晡三點，佇微博的熱搜榜前10名的話題中，有8項直接kah Abe前首相有關。佇真濟留言中雖然有人發表關心抑是想beh討論事件的文章，但是koh khah濟的是「慶祝」、「大歡喜」的言論。日本的網友實在看bē落去，kā中國chiah-ê違反人性的代誌kah文章，攏總kā翻譯作各國文字po出來hō͘全世界的人看中國是啥物款的國家。
隨時hō͘咱想起兩千外年前中國一位教育家孟子的話：「無惻隱之心，非人也。」孟子講的惻隱之心，tio̍h是慈悲憐憫的心，伊舉一個例講，有一個人看tio̍h一個細漢囝仔直直行倚去古井邊，伊tio̍h趕緊去kā chit-ê細漢囝仔抱起來。Chit-ê人是m̄是kah chit-ê細漢囝仔的父母有識似？m̄是。伊按呢做是m̄是為tio̍h beh hō͘庄裡的人謳咾？m̄是。伊按呢做干單出佇m̄甘chit-ê細漢囝仔跋落去古井niā-niā。孟子講，無慈悲憐憫心的，m̄是人。
聽講中國人口有十四億外，若是其中有一大堆攏m̄是人，實在會hông驚。Koh khah會hông煩惱的是，chiah-ê m̄是「人」的反對人流露出人性。七月初八hit工，中國媒體《澎湃新聞》駐日超過10年的記者曾穎，佇直播新聞描述事發經過，除了謳咾安倍「為中日友好作出非常巨大的貢獻」，伊講kah嚨喉tīⁿ起來哭kah bē出聲。真濟中國小粉紅看kah誠受氣kā出征，認為曾穎是為tio̍h安倍受害來傷心。曾穎事後有發文為家己「失態」會失禮，強調伊無應該kā個人情緒匟佇公眾平台。咱猶會記得，1989年六四天安門事件hit暗，日本NHK駐北京一位女記者報導一個少年人beh用身軀去擋戰車的時，伊滿面目屎、哭kah bē chhè-khùi，連人佇東京NHK的主播mā哭摻落去.。In兩位新聞工作者哭啥物？因為in有孟子講的惻隱之心，in是人。人，是按怎bē使哭？