十一月初七，新聞報導，台灣民眾黨發起人蔡壁如昨昏接受訪問的時發表「個人意見」，講會建議提名委員會邀請時代力量立委黃國昌，列作民眾黨不分區第一名。奇怪，柯文哲tòe中國頭人習近平講「兩岸一家親」，舊年m̄是hō͘黃國昌立委罵kah臭頭？但是一年來，柯文哲kah黃國昌兩個臭味相投，攏足拚勢罵蔡英文總統，比上大的在野黨中國國民黨罵koh khah歹、罵koh khah工夫。黃國昌若戇戇答應，代誌tio̍h大條，身為時代力量前主席hō͘台灣民眾黨掠去作不分區立委，時代力量tio̍h會使包起來、免sńg ah，柯文哲的台灣民眾黨tio̍h會公然來接收時代力量的票。無意外咱聽tio̍h黃國昌講，若收tio̍h邀請「我會拒絕」。
十月二九，傳出中國國民黨不分區立委安全名單，包括黨主席吳敦義、立法院黨團總召曾銘宗、中常委姚江臨、全國農田水利會會長林文瑞、副主席曾永權、台南市黨部主委謝龍介。真濟人有意見，十一月初二，中國國民黨中常委連勝文再度呼籲，政治家bē干單為家己，希望會tàng kā專業kah有號召力的人士排入不分區立委名單；對中國國民黨主席吳敦義所擬列不分區立委安全名單，該黨提名的台南市立法委員參選人蔡育輝、蔡淑惠有幾遍表達反對意見，十一月初六黨內thīn吳主席的人士講，「以無比的歡喜」請吳敦義列不分區，而且要求tio̍h kā chit兩個姓蔡的刣掉！黨主席吳敦義講，本黨不分區政治組一定會由女性chhōa頭，伊家己會tī適當機會排佇第八、九抑是十名。
十一月初七，立法院長蘇嘉全再次向民進黨主席卓榮泰表達，伊無愛hông列入不分區名單，mā希望黨中央mài koh提起伊。Hō͘人想起頂個月，伊的侄仔蘇震清立委向黨中央唱聲，伊若無hông列入不分區名單，伊tio̍h beh按怎按怎。民進黨卓主席大聲唱倒轉去，民進黨無驚人恐嚇！蘇震清隨時向黨主席會失禮。
2020年一月十一大選，選總統副總統kah立法委員，立法委員分作兩種，單一選區兩票制是講，一票是每一個選區選出一個立法委員、上懸票的當選；一票是選政黨，全國所有政黨票數除應選出的34位，tio̍h是每一個不分區立委當選的票數，條件是政黨票得票率超過5%才准算。政黨票愈濟分tio̍h的席位愈濟。每一黨預估有可能得偌濟票，tio̍h會tàng預估安全名單幾位，女性tio̍h佔一半。
無論囝仔大細、見若有看電視的人攏知影，感冒藥仔「斯斯」有兩種。今年咱台灣不分區立委提名mā是有兩種，一種是拒絕hông提名的，另外一種是hông拒絕提名的。照按呢看起來，今年各黨的不分區立委提名，會不止趣味。che是台灣四百年來m̄-bat有的。