九月初六，中國國民黨召開全國代表大會，中國國民黨黨代表陳麗旭（hiok）佇全代會上大聲喝講：「當年中國國民黨ùi中國kā黃金運來台灣，黃金的部分咱mài kah in算。但是故宮博物院的國寶完全無爭議。」伊呼籲黨中央tio̍h硬起來，chhōa逐個好好仔「演」一場，逐個做夥向政府kā寶物討轉來，以後故宮的門票收入tio̍h攏歸咱中國國民黨使用。
若有人問講：Chit-ê陳麗旭是啥物人？那會hiah厲害，有法度練chit款的siáu話？記持khah好的人會kā伊講：兩年前2018年高雄市長選舉的時，佇一場中國國民黨候選人韓國瑜的造勢大會，有一個鐵拍的「韓粉」佇台仔頂講伊按怎支持韓國瑜，伊大聲喝講：Mài講伊是烏道，準你若kā我講伊刣人放火，我猶原beh投hō͘伊，你kā我講伊搶劫，我mā是beh投hō͘伊，準講是你騙我，我mā是beh投hō͘伊。Ｈit-ê「韓粉」tio̍h是chit-ê陳麗旭。
一個練siáu話的嫌無夠，兩個練siáu話的掠來鬥。隔無兩工，中國國民黨前立委陳學聖佇伊的面冊頂面講，「對故宮國寶按怎來的，中國國民黨bē使無立場。」伊強調講，因為有中國國民黨的軍隊保護，chiah-ê國寶才無流落去別位。伊大聲喝講：「故宮國寶若m̄是中國國民黨的功勞，敢猶koh是誰人的功勞？中華民國國軍是1946年才成立的，chit-ê進前是黨軍，tio̍h是國民黨的部隊。」
那像拜神明poa̍h sīm-杯，無三（sam）不成禮。九月初九，中國國民黨立委葉毓蘭竟然tha̍h價加插一注講：中央銀行的黃金mā是中國國民黨帶來台灣的，建議中國國民黨要求政府發還。Chit-ê葉毓蘭比當年的蔣介石koh khah雄，當年身為中華民國總統koh是中國國民黨總裁的蔣介石，可能有數想beh kā國庫的黃金通對黨庫去，當時的中央銀行總裁俞鴻鈞確實是奉蔣介石命令，kā黃金運來台灣。來台灣了後，俞鴻鈞總裁有向蔣介石總統解說：黃金是中華民國的。蔣介石總統自按呢無koh講啥。
九月十九，第十二屆海峽論壇佇福建起鼓，九月二十主場開始，台灣前立法院長王金平chhōa團去參加。奇怪，王金平無kā中國國民黨的三個寶：黨代陳麗旭、前立委陳學聖kah現任立委葉毓蘭攏chhōa去，實在真無彩。Chit三個寶若佇論壇中做夥正式kā中國共產黨講，中國的土地是中國國民黨拍倒滿清政府得來的，中國共產黨tio̍h kā土地攏總還hō͘中國國民黨。若無，至少mā tio̍h讓十分之一的稅金hō͘中國國民黨來收。看中國共產黨會有啥款的反應。萬不幸chit三個寶若hō͘ in掠去，才會知影台灣實在有夠好，佇台灣有練siáu話的自由！