四月二二，世界有名的《紐約時報》對新加坡控制武漢肺炎疫情評論講：「差不多每一項代誌攏做tio̍h。」可惜是‧‧。重點佇可惜按怎。《紐約時報》謳咾新加坡初期抗疫成果誠好，有一站hông評判作災後上有復原潛力的國家之一。Ùi一月二三出現頭一起個確診病例以後，新加坡政府先後有關掉邊境、學校，詳細記錄而且追蹤每一名染病者的接觸對象，每一項高效率動作誠緊tio̍h降低病毒的傳播，hō͘ chit-ê高度都市化的國際化島國佇抗疫方面得tio̍h拍phok仔聲。
可惜是，四月中旬的兩禮拜後，新加坡確診病例真緊飆懸，到四月二一確診已經超過8,000例，成作東南亞確診數上懸的國家。《紐約時報》指出，新加坡最近新增加的確診病例大多數是外來的勞動階層，佇564萬人口的新加坡外勞kah in的家屬有十八萬出頭，大部分是ùi南亞kah中國來的。但是過去那像無受tio̍h新加坡富裕居民的注意，最近確診數量chhèng懸，那像有可能連政府mā忽視了in。報導指出，由新加坡政府設置，tòa滿外勞的挨挨kheh-kheh的宿舍最近爆發大規模傳染。四月二十1,426例確診、二一1,111例確診、二二1,016例確診、二三1,037例確診，逐工to̍h超過一千例，其中新加坡公民kah有永久居留權的民眾每工一、二十例niā-niā。四月二三新聞報導，新加坡政府為tio̍h防止疫情擴大，大規模隔離移工，規劃19個所在作移工隔離區。Chiah-ê移工的雇主講in無能力負擔，致使移工基本生活物資成作問題。好該哉，星加坡政府kah非政府組織合作，為移工提供食物kah飲用水。四月二四以後，每工確診例減落來六、七百個，四月二五以後減到五百外。四月三十，新加坡確診例已經來到16.169例，十工竟然增加8,169例確診，是真驚人、真恐怖的代誌！
二月二六，台灣中央流行疫情指揮中心公布第32例確診，發現chit-ê看護是印尼非法移工，勞動部原本beh動員全國各縣市政府徹查非法移工，但是二月二九，指揮中心指揮官陳時中指示，建立「防疫優先」的共識，暫時mài追查非法移工chit條。根據移民署統計，到今年一月三十一截止，國內猶有48,545名失聯移工。台灣國際勞工協會有呼籲，無論移工的身分有合法抑無，攏應該kā in納入防疫體系，但是若照現行法規的「驅離、處分、禁回合法身分」等做法，干單會kā非法移工迫kah變作防疫破口，政府應改採「不驅離」、「不處分」、「重新hō͘ in合法身分」等辦法，hō͘無證件的非法移工會tàng轉來防疫網內底。
請政府有關單位好好參考。若無，咱所講失蹤的「非法移工」，佇台灣若萬不幸變作防疫的「破口」，代誌tio̍h大條，bē收山tit！