九月二八下晡，中國國民黨新科主席朱立倫去到基隆謝票，伊批評民進黨「二十年來留佇原點不長進」，永遠「逢中必反」。朱立倫那會頭殼chiah無清楚、胡言亂語！講民進黨kah所有的台灣人「逢中必反」，意思是講見若講tio̍h「中國」，tio̍h一定反對。朱立倫歹心肝，thiau-tî kā「中國共產黨」（中共）講作「中國」簡稱作「中」。咱那是「反中國」？咱反的是「中國共產黨」（中共）。
咱來看民進黨執政最近chit幾年，台灣kah中國的貿易往來，2017年雙方的貿易量是1,814.7億美金，2018年是1,931億美金，2019年是1,905.7億美金，2020年是2,162.3億美金，而且差不多逐年攏有小可增加。啥人反中？
到2019年六月底為止，咱國的外籍配偶人數達到 54.9 萬人，若按國籍別來看，以中國配偶34.5萬人上蓋濟，約占62.8％。Beh按怎反中？
台灣中國雙方來往旅遊的人數，咱以2019年作例，中國來台灣旅遊的人數有2,714,065人次，是hit年來台灣旅遊外國人的第一名，台灣人去中國旅遊有2,003,023人次。2019年七月三十一，中國決定自2019年八月初一起暫停四十七個開放來台灣自由行的城市，全面暫停核發通行證。2020年初因為中國武漢肺炎大流行，雙方攏禁止人民去對方旅遊。M̄是反中。
2018年中國來台灣的研修生加學位生有25,049名，因為武漢肺炎疫情影響，台灣中央流行疫情指揮中心宣佈ùi 2020年一月二六起暫緩陸生研修生入境來台灣。敢是有人反中？M̄是。
照按呢看，民進黨kah所有的台灣人那有「反中國」咧？In所反的是「中國共產黨」簡單講是「中共」。Tio̍h是in黨的總書記習近平tī朱立倫當選中國國民黨主席寫賀電來hit-ê「中國共產黨」。咱為啥物「反中共」？因為「以黨領軍」、「以黨領政」hit-ê「中國共產黨」宣布無beh放棄「用武力拍台灣」，裝兩千外粒飛彈向台灣，各種戰機逐工侵入咱西南空域防空識別區來亂，以九月二三作例，中國解放軍有24架次軍機ùi台海中線以南空域，進入咱西南空域防空識別區。朱立倫家己tèⁿ kong假戇都慘死了ah！猶有面罵民進黨20年不長進，永遠「逢中必反」？咱看蔣介石總統kah蔣經國總統，老蔣至少ùi 1945年八月十五抗戰勝利hit工到1975年四月初五死去為止，30车不長進，永遠「逢中必反」：小蔣仝款ùi抗戰勝利hit工到1988年一月十三死去為止，主張kah中共「不接觸、不談判、不妥協」三不政策，43年不長進，永遠「逢中必反」，反中共。中國國民黨新科主席朱立倫，按呢罵in死去的黨總裁、黨主席，敢好？