六月十五，身兼台灣民眾黨主席的台北市長柯文哲，去台北市議會總質詢，社民黨市議員苗博雅講，台北市政府舉辦「2020台北燈節」，有設計一套深綠色的工作外套（誠súi的飛行夾克），提供hō͘工作人員穿。是按怎民眾黨立委蔡壁如、邱臣遠，甚至連民眾黨黨工mā有穿，頭前koh有印家己的名。苗議員the̍h相片hō͘柯文哲市長看，伊看一下煞gāng去，直直問徛佇邊仔的台北市觀傳局長劉奕霆「是啥人送的？」劉奕霆局長解說講，chit款式的工作外套，廠商會提供hō͘市府的長官。苗議員追問，hiah-ê m̄是市府長官的人，那會mā有工作外套？劉奕霆一時煞應無路，一下仔才講，有可能是發hō͘貴賓。苗博雅議員講奇怪，伊有看資料，蔡壁如、邱臣遠kah民眾黨黨工並無佇貴賓名單內底，hit工mā有別黨的立法委員去參加燈節，無人the̍h tio̍h外套。伊提醒劉奕霆beh講啥物話tio̍h先想清楚。苗博雅議員忍bē-tiâu才罵講，市庫是按怎通到黨庫去ah？柯文哲市長表示，以後發物資tio̍h簽收，伊會轉去查，mā tio̍h建立制度。
台灣民眾黨發言人陳宥丞回應講，hit款工作外套是西門徒步區街區發展促進會理事長劉家鑫，為tio̍h感念蔡壁如委員擔任市府顧問的時，對西門商圈發展有貢獻，特別捐贈同款的外套hō͘民眾黨黨部，並m̄是市府資產，為tio̍h避免造成社會各界誤會，特別按呢作澄清。
六月十六暗，《自由時報》記者拍電話問理事長劉家鑫。伊講：有民眾黨的人拍電話來講飛行夾克誠súi，正牌的一領佇國外可能tio̍h上萬，in真濟人攏真合意。問理事長敢會tàng幫忙？伊想講過去蔡壁如對商圈有真大的貢獻，所以伊tio̍h捐出30領。原本想beh用協會的名義捐，但是「hit-ê人」講bē使，因為協會是社團法人bē使按呢贊助in。所以我tio̍h想講無關係，小可錢我家己出。
蔡碧如立委身軀mā有穿一領，伊講衫按怎來的伊完全m̄知。
1936年十二月十二日，當時西北剿匪副總司令、東北軍將領張學良kah楊虎城將軍，發動一場軍事政變，迫蔣介石tio̍h抗日mài拍共產黨。歷史叫作「西安事變」。當時全國的記者攏拚去西安採訪，事變了，中國共產黨招待一大陣記者去參觀訪問當時中共的行政中心延安。記者轉去南京了後，當時軍事委員長蔣介石的夫人宋美齡有請khah親中國國民黨的記者飲茶，問in去看延安的印象。記者大大謳咾中國共產黨偌呢愛民，kā人民借一枝針一條線mā一定會還。蔣夫人宋美齡聽了講，設使恁講的若攏是事實，是因為in猶未tam-tio̍h權力的滋味。
可憐的台灣民眾黨，離權力猶足遠tio̍h chiah呢歹款，實在無品！