十一月十三，中國國民黨公布不分區立委名單，砲聲無停，但是mā有傳出中國「對台辦系統誠得意」的嘔佬聲，講in至少影響「前十名內的三個」。第一名罵香港抗爭的人是暴民、hit-ê警察大學退休教授葉毓蘭，第四名去中國聽習近平訓話、唱中國國歌、教伊嘴裡「咱的」中共人民解放軍按怎kah美軍相戰的退伍將軍吳斯懷，第八名臭彈講「統一是必然的，統一是必須的」，主張中國對台tio̍h「以武逼統」hit-ê前立委邱毅。黨中央講會tī十五「更新」名單。
政論節目主持人陳凝觀歸腹火，佇伊主持的節目中大罵黨主席吳敦義三分鐘，伊講：「台灣自了無刻虧過中國國民黨，是中國國民黨的政客刻虧tio̍h台灣。In年金領到死。中國國民黨政客chit-má相爭beh倚阿共ē，相爭beh搶倚阿共ē的統戰紅利，吳敦義今仔日做的tio̍h是teh搶統戰紅利，伊到今仔日猶teh領副總統的退休俸，吳敦義bē餓死，伊的家族mā bē餓死，bē餓死的人那tio̍h hiah呢趕緊beh去倚阿共ē？中華民國hông看tio̍h會吐的àu政客實在傷過àu！吳敦義領退休俸猶無滿意，koh數想別的政治利益、別的政治紅利。我公開講，我看你無起！」
十一月十五，中國國民黨的不分區名單有「小調」，但是無任何改善的誠意，猶原是爭議連連，hō͘人「大失所望」。無論按怎調整，黨主席吳敦義攏排佇名單內底、退伍將軍吳斯懷猶原是第四名。原本主張急統，排佇第八名的邱毅hông罵kah擋bē-tiâu、家己退出，換一個早前講是匪諜的張顯耀佇中央委員投票無過。
十一月十七，中國國民黨總統參選人韓國瑜講：「不分區名單離民意有一段真長真遠的落差，離咱所期待的年輕化kah多元化mā是無夠。」記者問in黨前副主席、台中市前市長胡志強對不分區名單的看法，伊應講：「Mài迫我罵人！」In黨前主席、新北市前市長朱立倫講：「我所有的朋友攏罵聲連連、幹聲連連，而且名單內有幾位有爭議。」In黨副主席、台北市前市長郝龍斌佇面冊頂面寫講：「吳主席退出不分區名單，才是挽救中國國民黨困境根本之道。」雖然調整了，黨主席吳敦義的名次有徙去khah後面，猶佇安全名單內底。草協聯盟發起人、已經hông開除黨籍的李正皓罵講：「吳敦義比我想的koh khah無能！一份不分區名單亂七八糟。」中國國民黨hông提名副總統參選人張善政講：中國國民黨的不分區名單「真正無法度無良心替伊背書」。認為「政黨票tio̍h出在人選。」
雖然中國國民黨主席吳敦義一直強調講：「中國國民黨不分區提名，自了m̄-bat有chiah呢公平公正。」但是吳主席無kā社會講「阮黨的價值是啥物」，致使一粒頭hông釘kah ná蜂巢，吳敦義主席變作一隻臭頭雞仔！