中國軍機ùi二月以來，至少有四遍擾亂咱外圍空域，其中一遍甚至鎖定咱F-16戰機。三月二十，中國國民黨不分區立法委員吳斯懷向行政院提出書面質詢竟然指出，se̍h台灣到底是經過台灣「周邊空域」抑是「侵犯領空」，相差誠大。無論是美國軍機抑是中共軍機se̍h過台灣周邊空域，「法理上bē使算是對咱國有明顯的挑釁意味」。華語講的「挑釁」，用咱台灣話是講「無事起空」。
第二工三月二一，國防部回應講，中共無顧in內部疫情嚴重，竟然佇咱國周邊海空域進行四遍「針對性」訓練，tio̍h是「挑釁」、「威脅」的具體事證，國防部以負責任的態度，完全照事實來講、絕對無誤導。
三月二一，中國國民黨文傳會主委王育敏表示，吳斯懷的言論干單會tàng代表伊個人，bē tàng代表中國國民黨中央。伊講歸堆，無一句譴責吳斯懷，干單會曉kā吳斯懷kah中國國民黨的關係切kah離離。
三月二一，中國國民黨基隆市前立委謝國佇面冊頂面發文講，中國國民黨不分區立委吳斯懷，佇立法院質詢講「中共軍機se̍h台灣無算挑釁」，伊認為吳斯懷無適任作中國國民黨不分區立委，希望這款人愈早離開立法院愈好。
三月二二，中國國民黨文傳會主委王育敏才表示，未來黨中央無排除會建立一套考核機制，hō͘不分區立委知影伊代表政黨，講話行踏tio̍h khah細膩。
頂懸的人tio̍h聽基層的聲音。三月二三，中國國民黨新北市議員葉元之講，
中國國民黨不分區立委吳斯懷的爭議無斷，連國民黨中央都出面切割「伊bē tàng代表國民黨」。伊講：理論上不分區立委tio̍h是代表中國國民黨，但是吳斯懷的行為無幫國民黨加分，顚倒扣分。
三月二四，中國國民黨台北市議員李明賢講：「若koh繼續放吳斯懷佇立法院按呢落去，2022中國國民黨免選ah！」
三月二五，中國國民黨主席江啟臣指出，「部分不分區委員」問政表現，hō͘中國國民黨形象受tio̍h考驗。」按呢是m̄是hō͘黨中席江啟臣點tio̍h名？吳斯懷表示，「我bē家己對號入座，ho ho ho ho。」對chiah呢bē見笑的人，若無直接摘名叫姓，in當然會激皮皮，in的想法tio̍h是：一皮天下無難事。
若像第一時間，中國國民黨文傳會主委王育敏所講的，吳斯懷的言論干單會tàng代表伊個人，bē tàng代表中國國民黨中央。有夠好笑，2020年總統立委大選，吳斯懷列佇中國國民黨不分區立委名單第四名，伊chit-má當teh做中國國民黨不分區立法委員，bē tàng代表中國國民黨中央。敢講伊是代表魔神仔？