五月以來，武漢肺炎本土病例攏無斷過，五月十二，本土確診病例16例破歷史新高，五月十四，本土確診病例險險仔加對倍變29例，五月十五chhèng 六倍外變180例，五月十六加二十外例niā-niā、hō͘人小可放心一下，無疑誤五月十七變作333例，全台灣的人皮攏繃ân起來。那像kah某一個確診者食過飯，假那有kah某一個確診者作夥唱過歌，隔壁hit-ê阿伯我有kah伊佇公園畫仙一過，活beh hông驚死！雖然指揮中心陳時中指揮官kā咱講kah真清楚：無接觸史、活動史而且無症頭的人，tio̍h無篩檢的必要。
但是無人招無人叫，真濟人為tio̍h「求心安」，tio̍h拼去大病院beh作篩檢（thai-kiám），造成醫院和篩檢站攏總人，hō͘真正需要做篩檢的人無法度順利篩檢；台北市先設臨時篩檢站，四位無夠加一位。新北市chia有幾十個確診、明仔載換hia有幾十個確診，除了原本有的市立病院，tio̍h koh加設兩個臨時篩檢站。桃園市增設三位臨時篩檢站：台南市為tio̍h避免確診病例進入病院，將動支500萬元緊急採購快篩試劑，加設30個快篩站，擴大篩檢量能。為tio̍h提昇篩檢量能，彰化基督教病院kah部立彰化病院擴增10倍快篩站。五月十七，嘉義各大病院攏有出現民眾排隊beh作篩檢。台中市增設十個快篩站，宜蘭縣增設八個快篩站。新竹市增設一個快篩站，新竹縣增設二個快篩站。四界攏tehe增加篩檢站。一時需要增加真濟篩檢的專業人員。
五月十五，雙北已經提升到三級警戒，另外有其他八縣市mā提升到準三級警戒。基層診所佇欠缺會tàng信賴的診斷標準kah快速診斷的工具條件下面，in所抵tio̍h的壓力相當大，無輸佇病院照顧隔離病房陽性個案之醫療同仁。五月十七，台灣耳鼻喉頭頸外科醫學會佇彰化基督教病院舉行記者會，號召所有會員佇完善的防疫裝備下面，全力支援社區篩檢站的工作，仝島一命、團結抗疫。彰化基督教病院院長陳穆寬表示，到目前為止，基層診所登記人數真緊tio̍h beh倚320位願意投入政府成立的社區篩檢站，萁中有93%願意主動投入為國貢獻專業。
五月十八，中央流行疫情指揮忠中心有對新北市診所醫師做一項問卷調查，發現in有積極全力投入防疫工作的意願，其中醫學中心的醫師佔88.3%、區域病院的醫師佔10.7%，會tàng支援的業務有：社區篩檢站篩檢，武漢肺炎疫苗注射，集中檢疫所、居家隔離、居家檢疫者、通訊診療kah照護工作。
真歡喜，佇篩檢chit項代誌頂面，咱感受tio̍h台灣人的愛心！ (210521)