2021年三月十五日，美國《紐約時報》講台灣是疫情中的「世外桃源」。文章寫講：新型冠狀病毒（咱講的武漢肺炎）hō͘全球生活kah經濟造成極大的混亂，台灣卻一直是一個世外桃源。無論是餐館、酒吧抑是咖啡廳逐工都挨挨陣陣。辦公大樓kah以前仝款無閒。學校內傳出無掛嘴掩的囝仔大聲喝咻的聲kah笑聲。Chit-ê人口2,400萬的自治島嶼，到今仔日干單十個人因為新型冠狀病毒疾病死亡，累計感染病例猶無到1,000例。（事實上今年三月十九，總確診數突破1,000例。）根據移民署的數據，2020年進入台灣的台灣人比離開的台灣人加beh 27萬人，大約是頂年凈流入人數的四倍。
實際上，台灣是舊年全世界無幾個經濟出現增長國家的一個。新冠疫情一開始，台灣經濟有小可放慢一站仔，但是第四季度的經濟kah 2019年仝期比起來有增長5%以上。政府預期2021年經濟增長率4.6%，che是七年來上蓋緊的增速。但是佇大多數情況下面，新冠病毒已經是台灣人目睭無teh看、心內無teh想的，因為台灣對確診的接觸者進行嚴格追蹤、對入境者進行嚴格隔離。
台灣chit種成就，當然m̄是天落落（lak-lo̍h）來的。是「中央流行疫情指揮中心」佇陳時中部長領導之下，全國醫護人員、警政人員、海關人員、各級行政人員，以及嘴掩國家隊、醫材防疫國家隊等等，以及全國人民守規矩配合防疫，才有的成果。三月二四，網路流傳一張圖，標題是：好佳哉防疫咱無聽（中國）國民黨的！好佳哉嘴掩無捐hō͘中國、好佳哉禁止嘴掩出口，所以逐家才一直有嘴掩thang掛；好佳哉無進行普篩（thai），好佳哉有做邊境防疫，所以咱成功kā病毒擋掉；好佳哉無換掉指揮官，所以台灣防疫hō͘世界各國肯定；（中國）國民黨ùi疫情爆發以來，防疫的每一項伊都質疑。In攏是錯誤的！所以，你敢會相信（中國）國民黨意圖成立疫苗採購調閱小組是正確的做法？
《伊索（I-sop）寓言》有一篇「父子騎驢仔」的故事，一對父子牽一隻驢仔beh去街仔賣。路邊有閒人笑講：那有hiah戇的人，有驢仔m̄騎。老父tio̍h叫囝仔peh起去騎；無偌久，有閒人講：那有hiah呢不孝的囝仔騎驢仔，hō͘ in老父行路！囝仔緊落來，換in老父peh起去騎；無偌久，路邊koh有閒人講，那有hiah無天良的老父，家己騎驢仔，叫in囝仔行路！老父叫囝仔mā peh起去騎。有閒人罵講，恁按呢虐待動物真可惡！恁應該扛驢仔才tio̍h。In tio̍h用棍仔扛驢仔。真濟人圍來看，驢仔驚一下liòng走跋落路邊的溪裡淹死去。
好佳哉咱政府足有智慧，防疫無聽中國國民黨的一大堆閒仔話！