前一站仔，前總統馬英九連續幾工大聲喝講：「無應該拒絕中國疫苗」，強調兩岸tī 2010年tio̍h有簽訂「兩岸醫藥衛生合作協議」，內底有包括「傳染病防治」kah「醫藥品安全管理kah研發」的合作機制。聽起來那像馬前總統的主張誠有道理。真歹勢，前立委、林靜儀醫師去péng出hit-ê協議的內容kā馬前總統搧嘴phóe講，「歸個協議看透透，叼位有寫講『會使進口中國製人用的疫苗』咧？」佇藥品安全管理kah研發hit條，合作範圍是「 雙方同意就兩岸醫藥品的非臨床檢測、臨床試驗、上市前審查、生產管理、上市後管理等制度規範，kah技術標準、檢驗技術kah其他相關事項，進行交流kah合作。」
二月二五，林靜儀醫師以「馬前總統， kah中國簽的hit份協議你是m̄是連看都無看？」作標題佇面冊頂面發文講，為tio̍h中國製的武漢肺炎（新型冠狀病毒病）疫苗，馬英九kah前衛生署長楊志良the̍h「海峽兩岸醫藥衛生合作協議」出來講，伊質疑身為前總統kah前政務官的馬、楊兩個人，「設使in若感覺中國製的血清製劑、人體疫苗會使入來台灣，2008年至2015年馬英九執政chit幾年為什麼無beh修法？」佇法律頂面，法律博士馬英九無專業！
真濟中國國民黨的立法委員teh吵講tio̍h進口中國疫苗。立法的委員那會講chiah呢無法律常識的話？事實上，台灣政府若真正進口中國疫苗，是公然犯法的行為，啥人都無可能去進口。唯一的辦法tio̍h是修法，中國國民黨chit-ê台灣第一大的在野黨，會使佇立法院提議修法，修法若過，台灣政府tio̍h會tàng光明正大進口中國的疫苗。立法委員那會使chiah呢無專業？
若是依法會使進口，並m̄是講一定tio̍h愛進口。法律囥一邊，有人問台灣衛生福利部長陳時中，那會無beh進口中國的武漢肺炎疫苗？二月十四，陳時中部長對chit-ê問題the̍h出解答，伊講，中國疫苗技術性的資料無完備，科學性的資料mā m̄-bat發表過，所以無列入去候選疫苗。陳時中部長佇無考慮政治、法律方面的問題，以醫療衛生的觀點講專業的話。
三月初三新聞報導，波蘭kah其他歐盟國家，疫苗接種計畫因為生產廠商延遲交貨煞受阻礙。三月初一，波蘭總統杜達的助理講，總統已經為tio̍h買武漢肺炎疫苗有kah中國國家主席習近平通電話。記者問波蘭衛生部長尼則斯基的看法，伊表示因為中國疫苗欠缺數據，伊目前無建議使用中國公司國藥集團生產的武漢肺炎疫苗。Che位波蘭衛生部長講的tio̍h是專業的話。
專業的人tio̍h講專業的話，專業的人講話無專業，會hông笑！