古早人寫文章講：看伊平地起懸樓，看伊宴賓客，看伊懸樓倒去。是寫一個平凡的人ùi無半項變作大發展，起懸樓，生活真chhia-iāⁿ，無偌久看伊懸樓倒去啥攏無。Ùi chit兩句話，我那像看tio̍h韓國瑜的身影。
2017年九月初七，當時的中國國民黨主席吳敦義派韓國瑜去作中國國民黨高雄市黨部主委，七個月後的四月初九伊才kā戶口遷去高雄市林園區，表態講伊beh參選高雄市長，五月二一佇in黨內初選民調結果嬴過對手立委陳宜民，hō͘中國國民黨提名作高雄市長候選人。2018年十一月二四，高雄市民用89萬2,545票kā韓國瑜sak起去高雄市長寶座。高雄市民是按怎會選hō͘ chit-ê kah高雄無因無緣的人咧？因為伊的競選口號誠響：貸出去，人入來，高雄發大財，聽tio̍h真爽！2018年十二月二五就任高雄市長，翻轉年五月中去香港丶澳門見中聯辦官員，害高雄市民驚一tiô，問講：那會按呢？
2019年六月初五，韓國瑜就任無六個月，高雄市長椅仔坐猶未燒，tio̍h拍破選前家己的保證bē半途離職的承諾，講願意被動徵召參加中國國民黨總統初選，七月十五黨內初選大嬴鴻海集團前董事長郭台銘。韓國瑜講伊若當選總統，會定定轉來高雄。名政論家姚惠珍講：Che那像一個人結婚無半年，看台北一個好額小姐伊tio̍h beh去追伊，結果追無tio̍h，koh倒轉來chōe in某，連會一句失禮都無。高雄人那食會消擋會tiâu咧！等伊做滿一年市長，當然會發起罷免伊。
Kah選舉仝款，罷免是人民的權利。六月初五，趙少康佇伊的節目《少康戰情室》講，韓國瑜以89萬票當選市長，卻干單需要57萬票tio̍h會tàng kā伊罷免，伊質疑che是無合理的情形。趙少康講的89萬票是超過一半選票、57萬票是四分之一選票，用四分之一選票罷免一半選票當選的市長，聽起來假那無合理，但是趙少康敢m̄知影韓國瑜會使發動「韓粉」出來投「反對罷免」的票，m̄免濟，「反對罷免」的票若比「贊成罷免」的票加一票，罷免tio̍h bē過。趙少康砲轟罷免韓國瑜會hō͘民主見笑死！真歹勢，六月初六高雄市民罷免韓國瑜市長的結果是，93萬9,090票贊成罷免，比一年半前韓國瑜當選市長the̍h tio̍h的89萬2,545票，koh khah濟四萬6,545票。請問趙少康，按呢是啥人會見笑？
民主政治上可貴的一點是：我合意你，選你作市長，你作了無好，我bē爽我tio̍h會使kā你罷免掉。Chit遍高雄市民罷免韓國瑜市長成功，hō͘全台灣的公職人員知影，民意那像水，會tàng載船，mā會tàng hō͘船péng過。咱那像有聽tio̍h高雄市民大聲歡呼：我高雄我驕傲！