2019年十二月初九，《英國廣播公司》“BBC”報導，芬蘭出現全世界上少年、三十四歲的女總理山娜‧馬林（Sanna Marin），伊領導的聯合政府中另外有四個政黨的領袖作部長mā攏是女性，三位三十出頭歲、一位五十外歲。桑娜‧馬林hông推選作總理進前，擔任交通部長。一禮拜前，原本的總理安蒂‧林內（Antti Rinne）因為處理郵政工人罷工事件引起爭議引咎（kiū）辭職。
隔壁國愛沙尼亞（Estonia）的內政部長馬特‧夏脈（Mart Helme）佇電台談話性節目中ge山娜‧馬林總理是「賣貨查某」。按呢bē直ah，愛沙尼亞反對黨叫伊tio̍h向芬蘭總理會失禮、koh tio̍h馬上辭職，講對職業歧視的人無資格作內政部長。山娜‧馬林總理有講in厝散赤，自細漢tio̍h做過各種工課，有一站做過店員賣物件，辛辛苦苦才讀完研究所the̍h tio̍h碩士學位，伊並無認為做工趁錢有啥見笑。愛沙尼亞內政部長馬特‧夏脈一再公開向芬蘭總理會失禮，講伊的本意是鼓勵逐個tio̍h親像山娜‧馬林hiah拍拚。按呢mā hông罵歸禮拜bē煞。
全世界的政治人物攏仝款，無應該the̍h人的性別、宗教信仰、種族、職業抑是身材來滾笑抑是來侮辱，犯tio̍h的人那像無代無誌夯竹竿去lā蜂巢hō͘蜂叮kah歸頭殼，koh一定會hông笑戇人。
十二月十七，中國國民黨主席吳敦義，出席中國國民黨總統候選人韓國瑜全國kah台北市勞工後援會成立大會，伊致詞的時批評蔡英文總統佇治安、經濟各方面攏做無好。續落去伊講，台灣真久無分屍案ah，但是蔡英文上任了後tio̍h koh發生幾若件ah，伊koh講「夭壽骨，蔡英文chit-ê衰尾查某」，chiah衰的人作總統，tio̍h hō͘伊落台。
十七暗，蔡英文總統佇面冊頂面表示，中國國民黨主席吳敦義用失格的語言攻擊伊，伊無認為chit款的政治文化應該hông接受，mā無法度接受用chit款的語言針對女性做出人身攻擊。綠黨不分區立委排名第一的鄧惠文醫師接受訪問的時表示，中國國民黨主席吳敦義講chit款的話真失格，呼籲選民用選票來抵制chit種有性別歧視的政黨。民進黨台北市第六選區立委候選人謝佩芬koh khah直接，伊問講：中國國民黨是m̄是無歧視女性tio̍h bē曉選舉？
中國國民黨主席吳敦義用話語侮辱女性m̄是頭一遍，mā無可能是上尾一遍，chit種「大查埔人主義」的人，學bē曉尊重女性，mā m̄知影政治人物bē使濫糝講話的人，佇中國國民黨的頭人內底，m̄是干單吳敦義主席一個niā-niā，chiah-ê人一定會hō͘時代的大海湧捲無去！