五月二八，日本《產經新聞》報導，日本政府一下知影武漢肺炎疫情佇台灣擴大，足欠疫苗，隨時考慮beh供應「AZ疫苗」hō͘台灣。報導講，日本政府有kah美國輝瑞藥廠簽約買1億9,400萬劑疫苗、有kah美國莫德納藥廠簽約買5,000萬劑疫苗。鬥起來有2億4,000萬劑（約1億2,000萬人份），確保16歲以上國民注疫苗的數量。另外日本政府有加買1億2,000萬劑的「AZ疫苗」，有beh送hō͘需要的國家，m̄-nā有台灣的份，而且會先詢問台灣政府需要疫苗的數量kah提供的時間。五月二八下晡，日本外相茂木敏充證實，日本政府有teh考慮提供「AZ疫苗」hō台灣，伊特別提起，tī 311東日本大地動了後，台灣上早提供支援募款援助日本。In知影台灣tī七月國產疫苗上市進前，真需要疫苗，所以日本政府才會拼六月初四送124萬劑疫苗去台灣。日本厚生勞動省有kah AZ藥廠協商修改合約條款，「AZ疫苗」才會tàng出貨去台灣。
事實上，2011年日本311大地動，台灣是第一個援助、援助上濟的國家，捐款超過200億日圓，比其他所有國家攏總的捐款koh khah濟。舊年四月，日本疫情擴大欠嘴掩的時，台灣捐送日本200萬片嚨掩。2016年台南地動，日本隨時捐美金一百萬；2018年花蓮地動的時，日本隨時派救難隊到災區救災。
對日本政府有beh提供「AZ疫苗」hō͘台灣，五月二八暗，蔡英文總統佇Twitter用日文寫出感謝文，伊講「台日之間的相結連，顯現出來民主國家會tàng透過互相協助，來強化對國家的治理，ná親像疫苗會tàng hō͘人免疫力按呢。我真歡喜tī chit-ê困難的時陣，台日間會tàng互相支持、鬥陣渡過難關的態度比以往koh khah鮮明，我對雙方深厚的友誼深深表示感謝。」
聽講日本政府beh提供「AZ疫苗」hō͘台灣，中國外交部發言人趙立堅第二工tio̍h唱聲：「台灣會tàng得tio̍h（中國）大陸疫苗的路是暢通的，若是藉疫苗『謀獨』（謀求獨立）是無可能達tio̍h目的ê。」
五月三十一，中國外交部發言人汪文斌佇記者會講，中國幾遍表示願意盡上大的努力幫助台灣同胞應對疫情，但是民進黨當局卻ùi政治私利出發，對中國的善意tèⁿ無看tio̍h，che是對台灣同胞生命健康的忽視kah thún踏。日本目前猶無法度確保自身疫苗的充足供給，卻宣佈beh向台灣地區提供疫苗。疫苗援助應該tio̍h回歸挽救生命的初衷，無應該淪落作圖謀政治私利的工具。伊上尾仔chit幾句話明明是teh罵in中國家己。
日本beh送疫苗hō͘台灣，中國teh跳啥？笑破人的嘴！