防疫tio̍h是預防kah消滅疾病的傳染kah流行，tio̍h是beh盡量減少tio̍h病的人，khah捷看tio̍h的是對付流行病、傳染病。Chit遍流行全世界的「武漢肺炎」雄kài-kài、koh惡chhih-chhih，到今年（2021）四月二九為止，全世界確診一億四千九百七十一萬八千八百六十六人，死亡三百十五萬三千四百十九人，康復八千六百九十七萬一千二百五十四人。
今年三月二十，歐洲幾個國家同時爆發反對防疫限制的示威遊行，in講是為tio̍h爭取自由，大聲喝「反對防疫」、「反對防疫封城」、「拒絕注疫苗」、「反對掛嘴掩」，示威遊行的人bē少：德國南部一個大城有兩萬人，英國倫敦有千外人，瑞士幾個城市鬥起來有五千外人，芬蘭有四百外人，奧地利維也納有成千人。In的共同特色是：真少人掛嘴掩、完全無保持社交距離，甚至無理性看tio̍h醫護人員開嘴喝拍！若是嘴喝「反對防疫」疫情tio̍h會變好，咱當然贊成用喝的khah緊koh省力。事實上m̄是按呢，in三月二十示威遊行hit工，全世界新增加確診四十六萬九千一百五十九人，死亡累積兩百六十九萬六千五百十亖人，四十工後的四月二九chit工，新增加確診八十八萬六千七百九十人，增加四十一萬七千六百三十一個人，死亡累積增加四十五萬六千九万零六人。
咱台灣「中央流行疫情指揮中心」會使講是「有嘴講kah無涎」，請逐個tio̍h捷用雪文洗手、坐公共交通工具抑是人濟的所在tio̍h掛嘴掩、tio̍h捷捷量體溫、人濟的所在tio̍h保持社交距離等等，老實講chiah-ê攏是保護家己、mài傳染hō͘別人，無辦法中上好的消極的辦法。積極的辦法是啥？tio̍h是等有效果的疫苗研究成功the̍h出來應用。咱講che tio̍h是有辦法的辦法。講「注疫苗」真濟人聽無，若講「預防注射」tio̍h khah濟人聽有。
千辛萬苦，世界各國的疫苗才研發成功有效果，咱政府千辛萬苦才買tio̍h數量有限真寶貴的疫苗，當然有優先順序、免費自費的差別。有一種人有優先權卻激soâiⁿ-soâiⁿ，無愛去注疫苗，Ná像西方國家hiah-ê「反防疫」的戇人。像中華航空的機師，一個兩個三個五個確診，攏無聽in講按怎，一直到九個機師加兩個家屬確診，才知thang驚。四月十二tio̍h開放航空公司機組人員會使注疫苗，是按怎到四月二四，長榮航空冇235人注過、中華航空才44人注過疫苗？優先注疫苗，m̄-nā是優先保護家己mā優先保護別人、特別是厝裡的人。是按怎無愛去注？理由是啥？敢會使kā in看作是另一類「反防疫」的戇人？
Ài，世界那有hiah濟反對防疫的戇人？