十一月初七，台北《蘋果日報》報導，離2022年台北市長選舉猶有兩年，針對藍、綠兩個陣營的熱門人選：中國國民黨的立法委員蔣萬安，kah民進黨的衛服部長陳時中，專訪台北市長柯文哲問伊的看法，伊講：「選市長」kah「作市長」是無仝的兩項代誌，「hāⁿ過無仝的領域」tio̍h經過測試才會知，chiah-ê人無經過測試。意思是講蔣萬安作立法委員、陳時中作衛服部長，beh「hāⁿ過無仝的領域」tio̍h經過「作市長」的測試才會知。而且，干單作過立法委員的蔣萬安，m̄-bat作過行政首長，作行政首長tio̍h愛下命令，tio̍h需要天賜的才能。
仝一日，衛服部長陳時中出席醫療奉獻獎頒獎典禮了後，接受媒體訪問的時記者問講，柯文哲市長批伊kah蔣萬安兩人，beh「hāⁿ過無仝的領域」來選台北市長，攏無經過「作市長」的測試。陳時中表示：「這mā是事實。」我有影無經過「作市長」的測試。關於「作市長」進前tio̍h愛先通過「作市長的測試」chit關，陳時中部長講，每人的意見無相siâng。
記者問柯文哲市長，幾年前你家己講是政治「素人」，你mā出來競選台北市長。意思是講，你chit-má才teh煽家己的嘴phóe？柯文哲市長面皮激厚厚講，
「所以前兩年亂舞，第三年才比較khah穩定落來，無thut-chhôe的政策。」伊家己講伊第一任的團隊是烏白鬥起來的一台車，但是第二任人事tio̍h非常穩定。
柯文哲市長評價歷任的台北市長，伊講其實前市長黃大洲做了上好，六條捷運同時開工、興建大安森林公園、基隆河截彎取直等攏是誠困難的百年志業，「真了不起」，但是黃大洲無考慮民調，伊選無tiâu。柯市長講，政治現實是「做得好的，無一定選會tiâu；選會tiâu的，無一定是做了好的。」柯文哲第二遍選會tiâu，是m̄是抵抵是無一定是做了好的？柯市長koh teh煽家己的嘴phóe！
柯文哲市長講beh「hāⁿ過無仝的領域」tio̍h經過「作市長」的測試才會知，事實上是講伊認為伊所合意的副市長黃珊珊上適合，伊講，上理想的狀況是hō͘黃珊珊來接班，黃珊珊誠認真學。柯文長市長m̄-thang bē記得，市長有代誌推hō͘副市長去負責去擔，家己無愛出面的場合叫副市長去，歹人叫副市長去做。黃珊珊副市長敢有學tio̍h你chiah-ê“àu-pō͘”？作副市長敢tio̍h是通過「作市長的測試」？
有謠言講柯文哲市長有意2024年beh選總統。阮苦勸伊m̄-thang！伊若出來選，是m̄是beh koh煽家己的嘴phóe，因為伊無經過「作總統」的測試。萬不幸若hō͘柯文哲選tiâu總統，台灣人是m̄是tioh忍受頭一任的頭兩年出在伊亂舞？
拜託柯文哲市長mài定定煽家己的嘴phóe。新聞相爭報導，但是真歹看！