十二月初九，是Chhe-khoh（捷克）前總統Habie（哈維爾）過身九週年紀念日，伊是天鵝絨革命的思想家之一，1993年到2003年間擔任Chhe-khoh（捷克）共和國總統。落任後隔轉年的2004年有來臺灣訪問，幾遍佇聯合國替台灣講話。為tio̍h感念Habie前總統對台灣、Chhe-khoh兩國關係的貢獻，楊黃美幸（楊黃美幸）特別tī chit工宣布，買一台Phòetòhu鋼琴送hō͘ Chhe-khoh首都Pulaha（布拉格）的音樂廳，做一件成功的國民外交。
楊黃美幸（楊黃美幸）贈送chit台鋼琴有幾層的意義。第一，今年九月Chhe-khoh國會議長chhōa一陣九十人團訪問台灣，引起中國不滿，隨時kā原本講好的鋼琴訂單取消掉，Chhe-khoh上有名的鋼琴製造商Phòetòhu無代無誌掃tio̍h風颱尾，楊黃美幸（楊黃美幸）一直替in抱不平。第二，聽講chit間Chhe-khoh國寶級的Phòetòhu鋼琴公司用五年的時間，特別打造一台慶祝創業150週年的鋼琴，koh聽講in誠希望chit台鋼琴會tàng留佇Chhe-khoh，第三，猶koh聽講首都Pulaha的Lutohu音樂廳足希望會tàng有chit台紀念鋼琴。楊黃美幸（楊黃美幸）kah厝裡的人參詳了後，決定買來送hō͘音樂廳。第四，足抵好chit台紀念鋼琴的價數kah九月hō͘中國取消訂單的金額新台幣六、七百萬差不多平濟，mā算是台灣還Chhe-khoh的Phòetòhu鋼琴公司一個補償。
當然，上重要的意義是紀念Chhe-khoh前總統Habie（哈維爾）過身九週年紀念日，感謝伊在生對台灣的友好幫忙，向伊致敬。
有人會問講楊黃美幸（楊黃美幸）是啥物人？其實伊是一個普通人，伊去美國留學了後，因為熱心關心台灣煞hông列作烏名單，伊bat hông選作「全美台灣同鄉會」會長，烏名單解除了後才會tàng轉來台灣，佇民進黨中央黨部擔任國際事務部主任，民進黨阿扁總統執政了後，bat作過外交部研究設計委員會主委、僑務委員會副委員長等職務。而後bat擔任台灣民主基金會副執行長，蔡英文總總統聘請伊擔任無任所大使幾年後辭掉。現此時是陳文成博士基金會董事長、國際自由婦女聯盟副主席、亞太自由婦女協會理事長。
有聽一個戇人講，捐一台鋼琴算作啥物國民外交？伊m̄知影，對外國人一個tìm頭、一個微微仔笑、任何友好的表現攏是國民外交。新台幣六、七百萬，mài講是一個國家，對一個財團抑是一個好額人來講mā是小錢。但是對一個平民百姓來講，是一條大條錢，新聞報導講伊kah厝裡的人參詳才決定的，看出台灣人的好女德。楊黃美幸（楊黃美幸）實在值得咱大大kā說謝kah謳咾！