台灣的武漢肺炎疫情有khah退熱、無hiah緊張，已經連續三十工無本土病例，che當然是好消息。五月十二，嘉義縣長召開會議了後，縣長翁章梁決定，縣府kah所屬機關的員工，包含縣轄所屬的學校kah幼兒園師生kah教職員，無koh硬性規定掛嘴掩，而且開放各社區據點活動，但是無做夥用餐、採取外帶便當，校園kah活動中心佇遵守防疫規範之下會使外借。
五月十三，新北市長侯友宜表示，掛嘴掩是台灣防疫成功的關鍵，關係室內空間掛嘴掩的規定，會等待最後階段才評估是m̄是放鬆免掛。五月十三早起，侯友宜主持防疫會議的時指出，「預防khah嬴治療」，伊ùi過年前tioh直直向民眾宣導，佇人濟的所在抑是密閉空間攏tio̍h掛嘴掩，保護家己mā保護別人的健康，有人講「健康的人無需要掛嘴掩」，並無搖動伊的堅持kah決心。
咱攏知影，beh追蹤感染者的家屬kah伊社交接接（chih-chiap）過的人比較khah容易，但要beh追蹤佇公車抑是捷運頂頭，啥人坐佇你的身邊tio̍h無hiah簡單。特別是，真濟「無症頭的帶原者」的傳染力才是厲害，你完全無可能知影徛佇你身邊、坐佇你邊仔的人是熊抑是虎，真濟人、特別是歐美人士攏想講：「健康的人無需要掛嘴掩」，in無想講，所有「無症頭的帶原者」攏mā想講伊家己是一個「健康的人」，免掛嘴掩；一個真正健康的人，伊mā無beh掛嘴掩，所以真自然病毒tio̍h傳染hō͘伊，伊不知不覺tio̍h hông傳染tio̍h ah！歐美國家的人無慣勢掛嘴掩，攏想講「健康的人無需要掛嘴掩」，按呢，你tio̍h知影為啥物歐美社區感染武漢肺炎那會hiah嚴重、歐美國家的群聚感染那會hiah厲害。
一個人khú-khú嗽抑是拍一個kha-chhiùⁿ，可能有3,000粒病菌飛出來，甚至連講話的時mā有可能ùi嘴ùi鼻噴出病菌。掛嘴掩是為家己好、mā是為別人好。
照醫生講法，一個人無注意的中間，一工有可能摸家己的面（包括鼻目嘴）一二十擺，咱的手有可能摸過有病毒留落來的物件，無隨時去kā手洗清氣，tio̍h去摸家己的面，mā有可能感染tio̍h病菌。除了定定洗手洗清氣以外，另外，若掛嘴掩mā khah bē用手去摸家己的面。
當然，家己一個人佇溪邊、佇樹林內、佇運動場，抑是佇路邊行路散步，無必要嘴掩掛tiâu-tiâu。但是佇任何人濟的所在，嘴掩掛tio̍h khah好。
因為chit半年來為tio̍h預防武漢肺炎感染，台灣人足勤洗手、掛嘴掩，是武漢肺炎無佇台灣大流行的原因之一。另外，照診所醫生所講，chit半年來流行性感冒、腸病毒的患者mā減少真濟。Koh提醒你一擺：掛嘴掩。